Wetinige qaytqan roh: merhum küresh kösenning yighmiliri shiwétsiye muzika arxipida (2)

Muxbirimiz qutlan
2016-11-01
Élxet
Pikir
Share
Print
Merhum küresh kösen ependining meqberisi.
Merhum küresh kösen ependining meqberisi.
Photo: RFA

Merhum küresh kösen wapatining 10 yilliq xatiriside uning küresh rohigha bay hayati zamandashlirining eslimiliride yad étilgen bolsa, uning bir ömür toplighan xususiy yighmiliri shiwétsiye döletlik muzika arxipida sifirlashturulup, ziyaretchilerning huzurigha sunuldi.

Uning bügün shiwétsiyede yashawatqan bir tughqan singlisi munewwer sultan xanim bu munasiwet bilen radiyomiz ziyaritini qobul qilip, akisining ömür deptiridin xatire teqdim qildi.

Munewwer xanimning eslishiche, akisi küresh sultan "Kösen" dégen bu texellusni 1987-yilidin bashlap resmiy qollan'ghan bolup, 1988-yili ürümchidiki sen'et institutini püttürüsh murasimigha béghishlap "Kösen simfoniyesi" namliq dangliq muzikisini ijad qilghan iken.

Merhum küresh kösenning sebdashliridin bügün gérmaniyede yashawatqan ablimit tursun ependi uning "Küresh ölmeydu" namliq ölmes naxshisi heqqide toxtilip, "Bu naxsha küresh kösenning küresh qaynimigha tolghan hayati we uning erkinlik yolidiki menggü ölmes küresh rohigha béghishlan'ghan xas eserdur," dep körsetti.

Ablimit tursun yene merhum küresh kösen hayat waqtidila özining sen'et talanti arqiliq shiwétsiye muzika sahesidikilerning diqqitini chekkenlikini, uning xususiy yighmilirining bügün shiwétsiye arxip we muzéyliridin orun élishining xushallinarliq bir ish ikenlikini tekitlidi.

Küresh kösenning sepdishi we a'ile tughqanliridin abdushükür muhemmet ependimu radiyomiz ziyaritini qobul qilip, merhumning xususiy yighmilirining qandaq bir jeryan bilen shiwétsiye döletlik muzika arxipidin orun alghanliqini bayan qildi.

Patrik xelzon - shiwétsiye muzika arxipining hawalisi bilen merhum küresh kösenning xususiy yighmilirini kataloglashturghan we uning sifirliq arxipini ishlep chiqqan yash shiwét Uyghurshunasliridin biri. U bu heqte radiyomiz ziyaritini qobul qilip, shiwétsiye muzika arxipida mexsus orun ajritilghan küresh kösen yighmilirining némilerni öz ichige alidighanliqini tonushturup ötti.

Abdushükür muhemmet ependi axirida shiwétsiye muzika arxipidiki küresh kösen yighmilirining da'irisi heqqide uchur bérip, bu yighmining shimaliy yawropadiki Uyghur jama'itining jem'iyet tarixini bilishte intayin muhim menbe bolup qalidighanliqini ilgiri sürdi.

Toluq bet