«Сидней уйғур ана тил мәктипи» 7 йиллиқини тәбриклиди

Мухбиримиз җүмә
2013-06-29
Елхәт
Пикир
Share
Принт
«Сидней уйғур ана тил мәктипи» оқуғучилири
«Сидней уйғур ана тил мәктипи» оқуғучилири
RFA

2006-Йили австралийиниң  сидней шәһиридә қурулған «уйғур ана тил мәктипи» ниң 7 йиллиқ хатирә мурасимида ана тилни қоғдашниң муһим вә шәрәплик вәзипә икәнлики оттуриға қоюлди.

Мурасимниң ечиш нутқини сөзлигән сәлимә камал ханим  муһәҗирәттики уйғурлар үчүн әң муһим болғини уйғур ана тилини пәрзәнтлиригә толуқ өгитиш хизмити икәнликини қайта тәкитлиди.

Хатириләш  мурасимиға мәктәптә оқуватқан 12 әтрапида оқуғучи вә 50 кә йеқин ата-ана қатнашти.

Оқуғучилар татлиқ уйғур тилида шеирларни декламатсийә қилип, ана тил сөйгүсини ипадилигән минутларда ата-анилар һайҗан яшлирини тутувалалмай қелишти.

Синипқа есилған «көп тиллиқ болуш шәрәплик, ана тилини унтуш җинайәт», «ана тил һоқуқ демәктур»,  «ана тилни қоғдаш һәр бир уйғурниң мәҗбурийити» дегәндәк шоар вә шәрқий түркистанниң ай юлтузлуқ көк байриқи мәзкур мәктәп  оқуғучиларға ана тил вә миллий кимлик позитсийәсини сиңдүрүштә  сәрп қилған қан-тәрини намаян қилип туратти.

Хатирә мурасимға қатнашқанларниң билдүрүшичә, өткән 7 йилда мәзкур мәктәп нәччә онлиған уйғур пәрзәнтигә уйғур ана тилини өгитипла қалмай, уйғурларниң миллий қәһриманлиқ һекайилириниму өгәткән.

Хатириләш мурасимида оқуғучилар декларатсийә қилған шәрқий түркистан җумһурийити армийисиниң марши  қатарлиқлар юқириқиларниң дәлили болалайтти әлвәттә.

Униңдин башқа мәзкур мәктәп оқуғучилиридин рафилә шөһрәт, иляс адил қатарлиқлар штатлиқ «ана тилини әң яхши өгәнгән оқуғучи мукапати» ға еришип ата-анисиға җүмлидин сиднейда яшаватқан шәрәп кәлтүргән.

Сидней уйғур ана тил мәктипи қурулған йәттә  йилдин буян һәрхил иссиқ-соғуқларни бешидин кәчүргән болсиму, изчил давам қилип кәлмәктә.

Толуқ бәт