"Sidnéy Uyghur ana til mektipi" 7 yilliqini tebriklidi

Muxbirimiz jüme
2013-06-29
Élxet
Pikir
Share
Print
"Sidnéy Uyghur ana til mektipi" oqughuchiliri
"Sidnéy Uyghur ana til mektipi" oqughuchiliri
RFA

2006-Yili awstraliyining  sidnéy shehiride qurulghan "Uyghur ana til mektipi" ning 7 yilliq xatire murasimida ana tilni qoghdashning muhim we shereplik wezipe ikenliki otturigha qoyuldi.

Murasimning échish nutqini sözligen selime kamal xanim  muhejirettiki Uyghurlar üchün eng muhim bolghini Uyghur ana tilini perzentlirige toluq ögitish xizmiti ikenlikini qayta tekitlidi.

Xatirilesh  murasimigha mektepte oquwatqan 12 etrapida oqughuchi we 50 ke yéqin ata-ana qatnashti.

Oqughuchilar tatliq Uyghur tilida shé'irlarni déklamatsiye qilip, ana til söygüsini ipadiligen minutlarda ata-anilar hayjan yashlirini tutuwalalmay qélishti.

Sinipqa ésilghan "Köp tilliq bolush shereplik, ana tilini untush jinayet", "Ana til hoquq démektur",  "Ana tilni qoghdash her bir Uyghurning mejburiyiti" dégendek sho'ar we sherqiy türkistanning ay yultuzluq kök bayriqi mezkur mektep  oqughuchilargha ana til we milliy kimlik pozitsiyesini singdürüshte  serp qilghan qan-terini namayan qilip turatti.

Xatire murasimgha qatnashqanlarning bildürüshiche, ötken 7 yilda mezkur mektep nechche onlighan Uyghur perzentige Uyghur ana tilini ögitipla qalmay, Uyghurlarning milliy qehrimanliq hékayilirinimu ögetken.

Xatirilesh murasimida oqughuchilar déklaratsiye qilghan sherqiy türkistan jumhuriyiti armiyisining marshi  qatarliqlar yuqiriqilarning delili bolalaytti elwette.

Uningdin bashqa mezkur mektep oqughuchiliridin rafile shöhret, ilyas adil qatarliqlar shtatliq "Ana tilini eng yaxshi ögen'gen oqughuchi mukapati" gha ériship ata-anisigha jümlidin sidnéyda yashawatqan sherep keltürgen.

Sidnéy Uyghur ana til mektipi qurulghan yette  yildin buyan herxil issiq-soghuqlarni béshidin kechürgen bolsimu, izchil dawam qilip kelmekte.

Toluq bet