Уйғур яш ғәюр ғалип шималий явропа бокс сәһнисидә көзгә көрүнүшкә башлиди

Ихтиярий мухбиримиз оғузхан
2018-01-17
Елхәт
Пикир
Share
Принт
Уйғур яш боксчи ғәюр ғалип(солда) данийәниң олборг шәһиридә өткүзүлгән «викиң бокс мунасбиқиси», йәни «деңиз қарақчиси намлиқ бокс мусабиқиси» дә нәтиҗә қазинип көмүш медалға еришти. 2018-Йили 6-январ.
Уйғур яш боксчи ғәюр ғалип(солда) данийәниң олборг шәһиридә өткүзүлгән «викиң бокс мунасбиқиси», йәни «деңиз қарақчиси намлиқ бокс мусабиқиси» дә нәтиҗә қазинип көмүш медалға еришти. 2018-Йили 6-январ.
RFA/Oghuzxan

Норвегийәдә яшайдиған уйғур яш боксчи ғәюр ғалип өзиниң кәспий җәһәттики тиришчанлиқи вә қолға кәлтүргән бир қатар нәтиҗилири билән шималий явропа бокс сәһнисидә көзгә көрүнүшкә башлиди.

Яш боксчи ғәюр ғалип 2018-йили 6-январ күни данийәниң олборг шәһиридә өткүзүлгән «викиң бокс мунасбиқиси», йәни «деңиз қарақчиси намлиқ бокс мусабиқиси» дә нәтиҗә қазинип көмүш медалға еришти.

Шу күни чүштин кейин өткүзүлгән мусабиқидә ғәюр ғалип биринчи мәйдандила шиддәтлик һуҗум қозғап, өзи билән тәң еғирлиқтики данийәниң тәҗрибилик бокс маһирини йәңди. Мусабиқиниң давамлашқан вақти интайин қисқа болуп, ғәюр бир минут 47 секунтқа йәтмигән вақит ичидә рәқибини уруп йиқитти. Мәйдан гүлдүрас алқиш садалириға чөмди.

Боксчи ғәюр ғалипниң 2016-йилидин буян скандинавийә әлләридә өткүзүлгән бокс мусабиқилиридә арқа-арқидин нәтиҗә қазиниши муһаҗирәттики уйғур җамаитидә, болупму уйғур яшлирида ғурур, миллий иптихарлиқ вә кәлгүсигә болған үмид-ишәнчилирини ойғатти.

Мусабиқидин кейин зияритимизни қобул қилған ғәюр ғалип өзиниң бокс саһәсидә қолға кәлтүргән нәтиҗилириниң әң алди билән уйғур хәлқигә мәнсуплуқини, тиришчанлиқ вә үзлүксиз алға илгириләш ирадиси болсила әркин дуняда яшаватқан уйғур яшлириниң чоқум өзлири қизиққан саһәләрдә мувәппәқийәт қазиналайдиғанлиқини билдүрди.

У йәнә өзиниң бирқанчә йиллар илгири ата-аниси билән биллә норвегийәгә келип олтурақлашқанлиқини, өзи кичикидин башлап һәвәс қилип кәлгән бокс чүшиниң бу әлдә аста-аста реаллиққа айланғанлиқини, әмма буниң үчүн һәссиләп тиришчанлиқ көрсәткәнликини тилға алди.

Бокс маһири ғәюр ғалипниң аниси һаҗигүл һамут ханимму радийомиз зияритини қобул қилип, оғлиниң техи шунчә яш туруп бокс саһәсидә бир қатар нәтиҗиләрни қолға кәлтүргәнликини, өзиниң буниңдин қаттиқ пәхирләнгәнликини билдүрди. У йәнә бир ана болуш сүпити билән муһаҗирәттики уйғур ата-аниларға пәрзәнтлириниң қизиқиши вә ирадисигә сәл қаримаслиқни, ата-аниларниң қоллиши вә илһам беришиниң һәрқандақ бала үчүн ғайәт зор мәниви һесаблинидиғанлиқини тәкитлиди

Биз ахирида йәнә норвегийә уйғур путбол командисиниң мәшқавули мутәллип әпәндини зиярәт қилдуқ. У мундақ деди: «һазир вәтәндә давамлишиватқан юқири бесимлиқ сиқинтилиқни һәммимиз билимиз. Мушундақ шараитта ғәюр ғалипниң бокс саһәсидә қолға кәлтүргән нәтиҗилири муһаҗирәттики яшлиримизға үмид, ишәнч вә тәсәлли беғишлайду, дәп ойлаймән.»

Яш боксчи ғәюр ғалип ата-аниси билән нөвәттә норвегийәниң җәнубидики кристиансанд шәһиридә биллә яшимақта. У 2016-йилидин буян шималий явропадики охшимиған дөләтләрдә өткүзүлгән бокс мусабиқилиригә он нәччә қетим қатнишип, илгири-кейин 3 алтун медал вә 1 көмүш медалға еришкән.

Пикирләр (0)
Share
Толуқ бәт