ئىستانبۇلدا «تەكلىماكان ئۇيغۇر كىتابخانىسى» ئېچىلدى

ئىختىيارىي مۇخبىرىمىز ئەركىن تارىم
2017-10-30
ئېلخەت
پىكىر
Share
پرىنت

تۈركىيەدە ئۇيغۇر نوپۇسىنىڭ كۆپىيىشىگە، ئۇيغۇر تەتقىقاتىنىڭ كۈچىيىشىگە ئەگىشىپ كىتابقا بولغان تەلەپمۇ ئۆسمەكتە.

ئۇيغۇرلارنىڭ بۇ تەلىپىنى قاندۇرۇش ئۈچۈن «تەكلىماكان ئۇيغۇر نەشرىياتى» كىتابخانا ئاچتى. ئۆتكەن ھەپتە ئىستانبۇلنىڭ زەيتىنبۇرنى رايونىدىكى ئەيسا يۈسۈپ ئالىپتېكىن كوچىسىدا ئېچىلغان كىتابخانىغا تەكلىماكان ئۇيغۇر نەشرىياتى نەشر قىلغان كىتابلاردىن سىرت، تۈركىيەدە ۋە دۇنيانىڭ ھەرقايسى جايلىرىدا نەشر قىلىنغان ئۇيغۇرچە، تۈركچە ئىنگلىزچە ۋە ئەرەبچە كىتابلارمۇ سېتىشقا سۇنۇلغان.

بىز كىتابخانىغا بېرىپ كىتابخانىنىڭ خوجايىنى ۋە مەزكۇر كىتابخانىغا كىتاب سېتىۋېلىش ئۈچۈن كەلگەن ئۇيغۇرلارغا مىكروفونىمىزنى ئۇزاتتۇق.

20 يىلدىن بېرى نەشرىياتچىلىق ئىشلىرى بىلەن شۇغۇللىنىۋاتقان ئابدۇجېلىل تۇران ئەپەندى كېيىنكى يىللاردا تۈركىيەدە، بولۇپمۇ ئىستانبۇلدا ئۇيغۇر نوپۇسىنىڭ كۆپىيىشىگە ئەگىشىپ ئۇيغۇرچە كىتابلارغا بولغان تەلەپنىڭمۇ ئۆسكەنلىكىنى، ئۇيغۇرلارنىڭ شۇنداقلا ئۇيغۇرلارنى تەتقىق قىلغۇچىلارنىڭ تەلىپىنى قاندۇرۇش ئۈچۈن بۇ كىتابخانىنى ئاچقانلىقىنى بايان قىلدى.

كېيىنكى يىللاردا چەتئەلدە كىتاب يېزىپ نەشر قىلدۇرۇۋاتقان ئۇيغۇرلارنىڭ سانىمۇ كۆپەيمەكتە. بۇنىڭ بىلەن بىرلىكتە ئۇيغۇر دىيارىدا كۆپلىگەن كىتاب خىتاي ھۆكۈمىتى تەرىپىدىن چەكلەنمەكتە. ئابدۇجېلىل تۇران ئەپەندى تەكلىماكان ئۇيغۇر كىتابخانىسىدا ئۆزلىرى نەشر قىلدۇرغان كىتابلاردىن سىرت «ۋەتەندە چەكلەنگەن كىتابلارنى» مۇ قايتا نەشر قىلىپ تارقىتىۋاتقانلىقىنى بايان قىلدى.

ئابدۇجېلىل تۇران ئەپەندى «تەكلىماكان ئۇيغۇر كىتابخانىسى» دا ئۇيغۇرلار ۋە شەرقىي تۈركىستان توغرىسىدا يېزىلغان تۈركچە، ئىنگلىزچە ۋە ئەرەبچە كىتابلارنى سېتىۋاتقانلىقىنى ئېيتتى.

ئۇنداقتا ئۇيغۇر ئوقۇرمەنلەر قانداق كىتابلارغا كۆپرەك قىزىقىدۇ؟ ئابدۇجېلىل تۇران ئەپەندى ئۇيغۇرلارنىڭ كۆپرەك دىن ۋە تارىخ ھەققىدىكى كىتابلارنى قىزىقىپ ئېلىۋاتقانلىقىنى تەكىتلىدى.

«تەكلىماكان ئۇيغۇر كىتابخانىسى» نىڭ ئېچىلغانلىقىنى تەبرىكلەش ئۈچۈن كەلگەن ئىستانبۇلدىكى ئۇيغۇر ئاكادېمىيەسىنىڭ رەئىسى ئابلىمىت قاراخان ئەپەندىگىمۇ مىكروفونىمىزنى سۇندۇق. ئۇ، تۈركىيەدە ئۇيغۇرلارنىڭ نەشرىياتچىلىق پائالىيىتىنى تۇنجى باشلىغان كىشىنىڭ ئابدۇجېلىل تۇران ئىكەنلىكىنى، ئۇنىڭ كىتاب خەزىنىسىنى مەزكۇر كىتابخانا ئارقىلىق ئۇيغۇرلارغا ئاچقانلىقىنى بايان قىلدى.

ئابلىمىت قاراخان ئەپەندى دۇنيانىڭ باشقا جايلىرىدا تاپقىلى بولمايدىغان نادىر كىتابلارنى «تەكلىماكان ئۇيغۇر كىتابخانىسى»دىن تاپقىلى بولىدىغانلىقىنى بايان قىلدى.

ئۇيغۇر زىيالىيلىرى «تەكلىماكان ئۇيغۇر كىتابخانىسى»دىن نېمىلەرنى كۈتىدۇ؟ دوكتور پەرھات تەڭرىتاغلى ئەپەندى تۈركىيەدە بەزى ئۇيغۇرچە كىتابلارنى تۈركچىگە، تۈركچە كىتابلارنى ئۇيغۇرچىغا تەرجىمە قىلىپ نەشر قىلىپ تارقىتىشنىڭ زۆرۈر ئىكەنلىكىنى تەكىتلىدى.

تۈركىيەدە نەشرىياتچىلىق بىلەن شۇغۇللىنىۋاتقان ئابدۇئېزىز ئەپەندى تۈركىيەنىڭ ئىستانبۇل شەھىرى دۇنيانىڭ ھەرقايسى جايلىرىدا ياشاۋاتقان ئۇيغۇرلار ئەڭ كۆپ زىيارەت قىلىدىغان جايلاردىن بىرى ئىكەنلىكىنى، ئىستانبۇلغا كەلگەن ئۇيغۇرلارنىڭ بۇ كىتابخانىلارنى زىيارەت قىلىپ كىتاب ئېلىپ كېتىۋاتقانلىقىنى بايان قىلدى.

2014-يىلىدىن ھازىرغىچە ئىستانبۇلنىڭ زەيتىنبۇرنى رايونىدا «سۇلتان ساتۇق بۇغراخان كىتابخانىسى»، «قۇتاتغۇ بىلىك كىتابخانىسى» ۋە «تەكلىماكان ئۇيغۇر كىتابخانىسى» نامىدا 3 كىتابخانا ئېچىلدى.

پىكىرلەر (0)
Share
تولۇق بەت