Истанбулда «тәклимакан уйғур китабханиси» ечилди

Ихтиярий мухбиримиз әркин тарим
2017-10-30
Елхәт
Пикир
Share
Принт

Түркийәдә уйғур нопусиниң көпийишигә, уйғур тәтқиқатиниң күчийишигә әгишип китабқа болған тәләпму өсмәктә.

Уйғурларниң бу тәлипини қандуруш үчүн «тәклимакан уйғур нәшрияти» китабхана ачти. Өткән һәптә истанбулниң зәйтинбурни районидики әйса йүсүп алиптекин кочисида ечилған китабханиға тәклимакан уйғур нәшрияти нәшр қилған китаблардин сирт, түркийәдә вә дуняниң һәрқайси җайлирида нәшр қилинған уйғурчә, түркчә инглизчә вә әрәбчә китабларму сетишқа сунулған.

Биз китабханиға берип китабханиниң хоҗайини вә мәзкур китабханиға китаб сетивелиш үчүн кәлгән уйғурларға микрофонимизни узаттуқ.

20 Йилдин бери нәшриятчилиқ ишлири билән шуғуллиниватқан абдуҗелил туран әпәнди кейинки йилларда түркийәдә, болупму истанбулда уйғур нопусиниң көпийишигә әгишип уйғурчә китабларға болған тәләпниңму өскәнликини, уйғурларниң шундақла уйғурларни тәтқиқ қилғучиларниң тәлипини қандуруш үчүн бу китабханини ачқанлиқини баян қилди.

Кейинки йилларда чәтәлдә китаб йезип нәшр қилдуруватқан уйғурларниң саниму көпәймәктә. Буниң билән бирликтә уйғур диярида көплигән китаб хитай һөкүмити тәрипидин чәкләнмәктә. Абдуҗелил туран әпәнди тәклимакан уйғур китабханисида өзлири нәшр қилдурған китаблардин сирт «вәтәндә чәкләнгән китабларни» му қайта нәшр қилип тарқитиватқанлиқини баян қилди.

Абдуҗелил туран әпәнди «тәклимакан уйғур китабханиси» да уйғурлар вә шәрқий түркистан тоғрисида йезилған түркчә, инглизчә вә әрәбчә китабларни сетиватқанлиқини ейтти.

Ундақта уйғур оқурмәнләр қандақ китабларға көпрәк қизиқиду? абдуҗелил туран әпәнди уйғурларниң көпрәк дин вә тарих һәққидики китабларни қизиқип еливатқанлиқини тәкитлиди.

«Тәклимакан уйғур китабханиси» ниң ечилғанлиқини тәбрикләш үчүн кәлгән истанбулдики уйғур академийәсиниң рәиси аблимит қарахан әпәндигиму микрофонимизни сундуқ. У, түркийәдә уйғурларниң нәшриятчилиқ паалийитини тунҗи башлиған кишиниң абдуҗелил туран икәнликини, униң китаб хәзинисини мәзкур китабхана арқилиқ уйғурларға ачқанлиқини баян қилди.

Аблимит қарахан әпәнди дуняниң башқа җайлирида тапқили болмайдиған надир китабларни «тәклимакан уйғур китабханиси»дин тапқили болидиғанлиқини баян қилди.

Уйғур зиялийлири «тәклимакан уйғур китабханиси»дин немиләрни күтиду? доктор пәрһат тәңритағли әпәнди түркийәдә бәзи уйғурчә китабларни түркчигә, түркчә китабларни уйғурчиға тәрҗимә қилип нәшр қилип тарқитишниң зөрүр икәнликини тәкитлиди.

Түркийәдә нәшриятчилиқ билән шуғуллиниватқан абдуезиз әпәнди түркийәниң истанбул шәһири дуняниң һәрқайси җайлирида яшаватқан уйғурлар әң көп зиярәт қилидиған җайлардин бири икәнликини, истанбулға кәлгән уйғурларниң бу китабханиларни зиярәт қилип китаб елип кетиватқанлиқини баян қилди.

2014-Йилидин һазирғичә истанбулниң зәйтинбурни районида «султан сатуқ буғрахан китабханиси», «қутатғу билик китабханиси» вә «тәклимакан уйғур китабханиси» намида 3 китабхана ечилди.

Пикирләр (0)
Share
Толуқ бәт