Tutqun memettursun da'imning kucha nahiyelik 3-terbiyelesh merkizide ikenliki delillendi

Muxbirimiz shöhret hoshur
2020-03-26
Élxet
Pikir
Share
Print
Kucha nahiyelik 4-ottura mektepning oqutquchisi memettursun da'im mukapatlan'ghan waqti.
Kucha nahiyelik 4-ottura mektepning oqutquchisi memettursun da'im mukapatlan'ghan waqti.
Oqurmen teminligen

Kucha nahiyelik 4-ottura mektepning nemunichi oqutquchisi memettursun day'imning 11 aydin buyan tutqunda ikenliki radiyomiz teripidin xewer qilin'ghandin kéyin kuchaliq muhajirlardin biri radiyomizgha uchur yollap, memettursun da'imning ayali nuriyening paralich késellikige giriptar bolghanliqi we nöwette béqishsiz qalghanliqini melum qildi. Muxbirimizning bu heqtiki éniqlishi dawamida memettursun da'imning nöwette kuchadiki 4 lagérdin biri bolghan atalmish "3‏-Terbiyelesh merkizi" de ikenliki delillendi.

Kuchaliq muhajirning inkas qilishiche, tutqun memettursun da'imning ayali nuriye 2012‏-yili méngisige qan chüshüsh bilen paralich bolup qalghan. Memettursun da'im tutqun qilin'ghandin kéyin uning ayali nuriye béqishsiz qalghan we ehwali kündin-kün'ge yamanlashqan. Memettursun tutqunda bolghanliqi üchün qolum-qoshniliri nuriyedin hal sorashqa we yardem qilishqa pétinalmighan.

Memettursun heqqide eng deslepte féysbukta uchur ashkarilighan Uyghuriye alp namidiki kishimu memettursuning orun tutup yétip qalghan ayalining teqdiridin endishe qiliwatqanliqini bildürgen idi.

Biz kucha nahiyelik ma'arip idarisige qayta téléfon qilip, memettursun da'imning ayalining ehwali heqqide melumat soriduq. Ma'arip idarisining bir xadimi nuriyening ehwalidin xewersizlikini, bu heqte 4‏-ottura mektep yaki nahiyelik edliye idarisining melumati barliqini tilgha aldi. Biz 4‏-ottura mekteptin bu heqte melumat alalmighandin kéyin nahiyelik edliye idarisige téléfon qilduq. Téléfonimizni qobul qilghan bir edliye xadimi ochuq halda memettursun da'im we uning ayali heqqidiki ehwallarni sorashqa bolmaydighanliqini bayan qildi.

Biz bu heqtiki éniqlashlirimiz dawamida memettursun da'im tutup turuluwatqan lagér heqqidimu melumat soriduq. Alaqidar bir saqchi xadimi memettursunning kucha nahiyesidiki 4 lagérdin biri, yeni eng chongi bolghan "3‏-Terbiyelesh merkizi" de ikenlikini ashkarilidi. Bu lagérning nahiye baziridin bir'az chette ikenlikini ilgiri sürgen bu xadim memettursun da'imning bu lagérda 10 minglarche tutqun bilen birlikte xitay tili öginiwatqanliqini ilgiri sürdi.

Weziyettin xewerdar kishilerdin yene biri memettursun da'imning xitay tiligha puxta ikenlikini eskertish bilen birlikte uning rishat we sheripe isimlik ikki perzenti barliqi, shunga nuriyening öyde yalghuz emesliki, peqet memettursun da'im tutqunda bolghanliqi üchün doxturxanidiki doxtur we sistéralarning uninggha jiddiy halda köngül bölelmeydighanliqidin endishe qiliwatqanliqini ilgiri sürdi.

Toluq bet