Мәшһур лагер сүритидики йәнә бир мәһбусниң семонт завути шопури - мәттурсун езиз икәнлики ашкариланди

Мухбиримиз шөһрәт һошур
2019-08-09
Елхәт
Пикир
Share
Принт
Лагерға қамалған лоп наһийәлик семонт завутиниң шопури мәттурсун езиз (алдинқи рәт солдин иккинчи киши).
Лагерға қамалған лоп наһийәлик семонт завутиниң шопури мәттурсун езиз (алдинқи рәт солдин иккинчи киши).
Photo: RFA

Алдинқи айларда биз лоп наһийәлик «тәрбийиләш мәркизи» гә аит мәшһур лагер сүритидики бәш нәпәр мәһбусниң кимлики һәққидә мәлуматлар бәргән идуқ. Бүгүн муһаҗирәттики лоплуқлардин бири радиомизға учур йоллап, мәзкур сүрәттә әң алдинқи рәттә олтурған кишиләрниң бириниң лоп наһийәлик семонт завутиниң шопури мәттурсун езиз икәнликини мәлум қилди. Телефонимизни қобул қилған мәзкур семонт завутидики бир хадим мәттурсун езиз қатарлиқ бу завуттики бир қисим шопурларниң «дөләт тили» өгиниватқанлиқини баян қилиш арқилиқ мәттурсунниң лагерда икәнликини дәлиллиди.

Һөрмәтлик радио аңлиғучилар, лоплуқ муһаҗирниң инкас қилишичә, мәзкур мәшһур лагер сүритидә әң алдинқи рәттә олтурған кишиләрниң бириниң лоп наһийәлик семонт завутиниң шопури мәттурсун езиз болуп, у 2017‏-йилиниң бешида лагерға әкетилгән. Сақчилар өйидин елип маңғанда униң 15 күнлүк сиясий өгинишкә маңғанлиқи вә өгиниш түгигән һаман қоюп берилидиғанлиқи уқтурулған икән. Әмма у та һазирғичә қоюветилмәйла қалмастин, бәлки йәнә аилә-тавабиатлири биләнму көрүштүрүлмигән.

Лоп наһийәлик һөкүмәттики хадимлардин бәзилири семонт завутиниң шопури мәттурсун езизни тонумайдиғанлиқини билдүрсә, йәнә бәзилири бу һәқтә әдлийә идариси вә семонт завути қатарлиқ мунасивәтлик орунлардин учур елишимизни тәвсийә қилди. Радиомизға кәлгән инкаста мәттурсун езизниң 40 яшлар чамисидики бири икәнлики, 4 пәрзәнтниң атиси икәнлики вә 2010‏-йиллардин буян семонт завутида ишләп келиватқанлиқи тилға елинған. 

Семонт завутиниң хадими дәсләптә бу әһвалдин хәвәрсизликини ейтқан болсиму, әмма сөзиниң ахирида семонт завутидики бир қисим шопурларниң нөвәттә «дөләт тили» өгиниватқанлиқини баян қилиш арқилиқ мәттурсун езизниң лагерда икәнликини дәлиллиди. Инкаста йәнә мәттурсун езизниң түрмидики оғлини йоқлашқа барған бир қошнисини машинисиға салғанлиқи вә униң билән биргә түрмигә барғанлиқи үчүнла «идийәсидә мәсилә бар» дәп қарилип лагерға әкетилгәнлики йезилған. Биз бу инкастики униң тәвәлик мәлуматиға асасән лоп наһийә базар ичи 1‏-кәнт аһалиләр комитетиға телефон қилдуқ. Кәнт кадирлиридин бири мәттурсун езизниң икки йил бурун тутулғанлиқи вә «кәйфачү» йәни ечиветиш районидики йиғивелиш лагерида тутуп турулуватқанлиқини дәлиллигән болсиму, әмма униң немә үчүн тутулғанлиқини дәп берәлмиди. У йәнә мәттурсун езизниң аилидә бәш қериндаш икәнлики, униң бир инисиниң намәлум сәвәбләр билән бир йилчә лагерда йетип чиққанлиқини ашкарилиди. 

Һөрмәтлик радио аңлиғучилар, мәшһур лагер сүритидики тутқунлардин йәнә бириниң, йәни кимлики ашкариланған кишиләрдин алтинчисиниң лоп наһийәлик семонт завутиниң шопури мәттурсун езиз икәнлики һәққидә аңлитиш бәрдуқ.

Пикирләр (0)
Share
Толуқ бәт