Meshhur lagér süritidiki yene bir mehbusning sémont zawuti shopuri - mettursun éziz ikenliki ashkarilandi

Muxbirimiz shöhret hoshur
2019-08-09
Élxet
Pikir
Share
Print
Lagérgha qamalghan lop nahiyelik sémont zawutining shopuri mettursun éziz (aldinqi ret soldin ikkinchi kishi).
Lagérgha qamalghan lop nahiyelik sémont zawutining shopuri mettursun éziz (aldinqi ret soldin ikkinchi kishi).
Photo: RFA

Aldinqi aylarda biz lop nahiyelik "Terbiyilesh merkizi" ge a'it meshhur lagér süritidiki besh neper mehbusning kimliki heqqide melumatlar bergen iduq. Bügün muhajirettiki lopluqlardin biri radi'omizgha uchur yollap, mezkur sürette eng aldinqi rette olturghan kishilerning birining lop nahiyelik sémont zawutining shopuri mettursun éziz ikenlikini melum qildi. Téléfonimizni qobul qilghan mezkur sémont zawutidiki bir xadim mettursun éziz qatarliq bu zawuttiki bir qisim shopurlarning "Dölet tili" öginiwatqanliqini bayan qilish arqiliq mettursunning lagérda ikenlikini delillidi.

Hörmetlik radi'o anglighuchilar, lopluq muhajirning inkas qilishiche, mezkur meshhur lagér süritide eng aldinqi rette olturghan kishilerning birining lop nahiyelik sémont zawutining shopuri mettursun éziz bolup, u 2017‏-yilining béshida lagérgha ekétilgen. Saqchilar öyidin élip mangghanda uning 15 künlük siyasiy öginishke mangghanliqi we öginish tügigen haman qoyup bérilidighanliqi uqturulghan iken. Emma u ta hazirghiche qoyuwétilmeyla qalmastin, belki yene a'ile-tawabi'atliri bilenmu körüshtürülmigen.

Lop nahiyelik hökümettiki xadimlardin beziliri sémont zawutining shopuri mettursun ézizni tonumaydighanliqini bildürse, yene beziliri bu heqte edliye idarisi we sémont zawuti qatarliq munasiwetlik orunlardin uchur élishimizni tewsiye qildi. Radi'omizgha kelgen inkasta mettursun ézizning 40 yashlar chamisidiki biri ikenliki, 4 perzentning atisi ikenliki we 2010‏-yillardin buyan sémont zawutida ishlep kéliwatqanliqi tilgha élin'ghan. 

Sémont zawutining xadimi deslepte bu ehwaldin xewersizlikini éytqan bolsimu, emma sözining axirida sémont zawutidiki bir qisim shopurlarning nöwette "Dölet tili" öginiwatqanliqini bayan qilish arqiliq mettursun ézizning lagérda ikenlikini delillidi. Inkasta yene mettursun ézizning türmidiki oghlini yoqlashqa barghan bir qoshnisini mashinisigha salghanliqi we uning bilen birge türmige barghanliqi üchünla "Idiyeside mesile bar" dep qarilip lagérgha ekétilgenliki yézilghan. Biz bu inkastiki uning tewelik melumatigha asasen lop nahiye bazar ichi 1‏-kent ahaliler komitétigha téléfon qilduq. Kent kadirliridin biri mettursun ézizning ikki yil burun tutulghanliqi we "Keyfachü" yeni échiwétish rayonidiki yighiwélish lagérida tutup turuluwatqanliqini delilligen bolsimu, emma uning néme üchün tutulghanliqini dep bérelmidi. U yene mettursun ézizning a'ilide besh qérindash ikenliki, uning bir inisining namelum sewebler bilen bir yilche lagérda yétip chiqqanliqini ashkarilidi. 

Hörmetlik radi'o anglighuchilar, meshhur lagér süritidiki tutqunlardin yene birining, yeni kimliki ashkarilan'ghan kishilerdin altinchisining lop nahiyelik sémont zawutining shopuri mettursun éziz ikenliki heqqide anglitish berduq.

Toluq bet