Cherchendiki qosh apetning ziyini éghir bolushi mumkin

Muxbirimiz gülchéhre
2013-11-25
Élxet
Pikir
Share
Print
Yer tewreshte apetke uchrighan Uyghur a'ilisi. 2013-Yili 24-noyabir, cherchen.
Yer tewreshte apetke uchrighan Uyghur a'ilisi. 2013-Yili 24-noyabir, cherchen.
internet blog

Amérika yer tewreshni közitish merkizi, 24-noyabir cherchen nahiyiside 5.6 Bal küchlük yer tewresh hadisisi körülgenlikini élan qildi. Tengritagh torimu bügün bu heqte xewer élan qilip, cherchen nahiyisining tura, könchibulaq charwichiliq meydani, achchan yézisi, qoramliq yézilirida 2389 adem apetke uchrighanliqini, hazirghiche téxi ölüm-yétim ishliri heqqidiki uchurlarning namelum ikenlikini qildi. Apet ehwali heqqide igiligen uchurlirimizdin ashkarilinishiche, yer tewresh yüz bergen da'ire cherchen nahiyisining bir qeder namrat taghliq, charwichiliq rayonliri bolup, tok we téléfon, tor alaqiliri téxi mukemmel emes. Rayondiki xelq yer tewresh apiti bilen teng yene qar apitige duch kelgen.

24-Noyabir sa'et 07:30:46 de, cherchen nahiyisi (shimaliy kenglik 36.8 Gradus, sherqiy uzunluq 86.7 Gradus) de 5.6 Bal yer tewrigen, tewresh menbesi cherchen nahiye bazirining jenubidiki ko'inlun téghida bolup, cherchen nahiye bazirigha 181 kilométir kélidiken. Yer tewreshning tesiri tura, könchibulaq charwichiliq meydani, achchan yézisi, qoramliq yézilirida bir qeder éghir körülgen.

Xitay da'iriliri yer tewresh yüz bergendin kéyin, cherchen nahiyilik partkom, xelq hökümiti yer tewreshke taqabil turush idarisi, nahiyilik j x idarisi,, xelq ishliri, bixeter ishlepchiqirishni nazaret qilish idarisi qatarliq orunlar birlikte, charwichilar, kan xadimlirining ehwali hemde ularning öylirining, qotanlirining ziyan'gha uchrash ehwalini igiligen. Ularning xitay agéntliqlirigha bergen uchurigha asaslan'ghanda, 24-noyabir sa'et 22:00 giche, yer tewreshte 2389 adem apetke uchrap, 10 éghiz öy örülüp chüshken, 675 éghiz öyning tamlirigha dez ketken؛ 33 qotan, 10 yem-xeshek ambiri örülüp chüshken. Deslepki mölcherge qarighanda, biwasite iqtisadiy ziyan 2 milyon 350 ming yüen'ge yetken. Nöwette adem qaza qilish we yarilinish toghrisida melumat yoq iken.

Biz cherchen nahiyilik partkom bilen alaqileshtuq, bir xitay sékrétar, apet ziyini heqqide téxi yéngi melumat yoqluqi, tor we téléfon kashilisi bolghachqa apet rayoni bilen alaqilishish teslikini bildürdi.

Cherchen nahiyilik xelq hökümiti ishxanisida kéchilik nöwetchilikte turuwatqan bir Uyghur kadir, qalghan kadirlarning yer tewresh apiti yüz bergen jaylargha ketkenlikini, apetning éghir bolghanliqini, emma ölüsh yarilinish ehwali heqqide téxiche melumat élinmighanliqini bildürdi.

Cherchen nahiye memur toridiki uchurlargha qarighanda, yéqinqi künlerde yer tewresh apiti yüz bergen tura, könchibulaq charwichiliq meydanlirida uda qar yaqqan bolup hawa témpératurisimu barghanche töwenligen, bu jaylardiki amma yer tewresh we qar apitige tengla uchrighan bolup, da'irilerning statistika qilishiche, örülgen qotan we öyler asasen mushu ikki charwichiliq rayonlirida iken. Bu apet rayonlirida téléfon we tok yollirimu kashiligha uchrighan bolup, apettiki xelqtin melumat élish mumkinchiliki bolmidi. Emma könchibulaq apet rayonigha ehwal igileshke ewetilgen, nahiyilik hökümet xelq ishliri idarisi kadiri lyu léyning yanfon nomurigha téléfon uliduq, gerche téléfon ulan'ghan bolsimu, lyu léy bizning erkin asiya radi'osidin xewer igilewatqanliqimizni bilip téléfonni üzdi.

Nahiye ichide olturushluq bir Uyghur ayal, 6 bal etrapida yer tewrigenlikini xewerdin körgenlikini, yer tewresh apiti yüz bergen jay yiraq hem namrat, alaqilishish qulaysiz yézilar bolghachqa, apetning éghir bolghanliqini texminlewatqanliqini bildürdi.

Xitay hökümiti 2011-yilidin kéyin tebi'iy apetler heqqide waqtida chin xewer bérish heqqide belgilimilerni chiqarghan bolsimu, Uyghur élida yüz bergen apet we bashqa insanlar hayatigha tehdit yetken tuyuqsiz yüz bergen weqeler da'iriler teripidin yoshurup we yaki kéchikip xewer qilinmaqta.

2004-Yili 2-ayda maralbéshi nahiyisining chongqurchaq qatarliq yézilirida 7 balgha yéqin yer tewrep, mingdin artuq adem ölgen, 50 mingdin artuq adem öy-makansiz, hemde üch kün'ge qeder yardemsiz qalghan idi.

Toluq bet