Режиссор абдурахман өзтүркниң «мән калман» намлиқ китаби түркийәдә йоруқ көрди(2)

Мухбиримиз гүлчеһрә
2017-12-21
Елхәт
Пикир
Share
Принт
яш уйғур режиссор абдурахман уйғур өзтүрк.
Яш уйғур режиссор абдурахман уйғур өзтүрк.
Social Media

«Ақ кит» намлиқ киноси билән түркийәдә тонулушқа башлиған яш уйғур режиссор абдурахман өзтүрк нөвәттә өзиниң һаят һекайиси тәсвирләнгән «мән калман»(бән каллманним) намлиқ китаби билән йәнә бир қетим түркийә мәтбуатлирида тонуштурулмақта.

Абдурахман өзтүрк әпәнди өмридә китаб йезип бақмиған. Униң үстигә түрк тили сәвийәси чәклик болушиға қаримай, китабта өзиниң 36 йиллиқ һаят кәчмишлирини наһайити сәмимий вә тәбиий рәвиштә ипадә қилишқа тиришқанлиқи үчүн әсәр түрк таратқулирида қизиқиш пәйда қилған. У өзи һәққидики бу тунҗи китабиниң мувәппәқийәтлик чиқишида нурғун түрк достлириниң қоллиши вә сәмимий ярдимигә еришкәнликини тилға алди.

У йәнә түрк тилида йезилған бу кәчмишлириниң оқурмәнләргә сунғудәк һалға келиши вә өлчәмлик бир китаб сүпитидә нәшргә тәйярлинишида китабниң тәһрири нурҗан қара ханимниң көп әҗир сиңдүргәнликини алаһидә әскәртип өтти.

Биз нурҗан ханимдин китабниң йезилиш услуби һәққидә әһвал игилидуқ.

Нурҗан ханим кичик пеиллиқ билән абдурахман өзтүрктәк бир уйғур билән тонушқанлиқидин, униң аҗайип чин һекайиси вә сәмимий һәм тәбиий баянлириниң тунҗи оқурмини болғанлиқидин мәмнун икәнликини билдүрди. Нурҗан ханим абдурахманниң тил вә услубиға болған баһасини билдүрүп мундақ дәйду: «әлвәттә, һәр адәм өз ана тилида сөзләргә әң бай болиду, әмма абдурахман өзиниң түркчә сәвийәси пишқан бир пәйттә бу китабни язди. Китабни нәшргә тәйярлаш җәрянида көп сөһбәтләштуқ. У бара-бара түркчә мәнидаш сөзләр ичидики әң мувапиқини таллап ишлитәләйдиған болди. Буниңдин бәкму мәмнун болдум. Униң үстигә, у башқилардин пәрқлинидиған пәвқуладдә сәргүзәштлирини аҗайип тәбиий вә сәмимий ипадилигән иди. Һәр бир китабхан язғучиниң сәмимийитини маңа охшашла тәсирлинидиғанлиқиға ишинимән. Чүнки уни оқуғанда худди аптор алдиңизда олтуруп, һечкимгә аңлитип бақмиған һекайилирини сөзләп бериватқандәк һес қилисиз.»

Режиссор абдурахман өзтүрк сөһбитимиз давамида өзи гириптар болған калман синдроми кесәллики гәрчә һаятқа тәһдит елип келидиған җиддий бир кесәллик болмисиму, әмма бир өмүр тохтатмай дориға тайинишқа тоғра келидиғанлиқини, йеқинқи йилларда өзидә давалашниң көрүнәрлик үнүми көрүлүп, һаятқа башқичә бир йеңи үмид вә ишәнч билән қараватқанлиқини билдүрди. У башқиларниму үмидлик яшашқа илһамландуруш мәқситидә китабиға мәрһум сәнәткар күрәш күсәнниң «күрәш өлмәйду» дегән нахшисиниң текистини қистурғанлиқини тәкитлиди.

Уйғур режиссор абдурахман уйғур өзтүрк, «мән калман» намлиқ бу тунҗи китабини өзи үчүн йеңи ғайә турғузуш вә нишанларни бекитиштики илһам мәнбәси дәп қарайдикән. У нөвәттә бу китабни уйғур вә башқа тилларға тәрҗимә қилиш вә уни кино қилип ишләш арзулири йолида издәнмәктикән.

Пикирләр (0)
Share
Толуқ бәт