Rézhissor abduraxman öztürkning "Men kalman" namliq kitabi türkiyede yoruq kördi(2)

Muxbirimiz gülchéhre
2017-12-21
Élxet
Pikir
Share
Print
Yash Uyghur rézhissor abduraxman Uyghur öztürk.
Yash Uyghur rézhissor abduraxman Uyghur öztürk.
Social Media

"Aq kit" namliq kinosi bilen türkiyede tonulushqa bashlighan yash Uyghur rézhissor abduraxman öztürk nöwette özining hayat hékayisi teswirlen'gen "Men kalman"(ben kallmannim) namliq kitabi bilen yene bir qétim türkiye metbu'atlirida tonushturulmaqta.

Abduraxman öztürk ependi ömride kitab yézip baqmighan. Uning üstige türk tili sewiyesi cheklik bolushigha qarimay, kitabta özining 36 yilliq hayat kechmishlirini nahayiti semimiy we tebi'iy rewishte ipade qilishqa tirishqanliqi üchün eser türk taratqulirida qiziqish peyda qilghan. U özi heqqidiki bu tunji kitabining muweppeqiyetlik chiqishida nurghun türk dostlirining qollishi we semimiy yardimige érishkenlikini tilgha aldi.

U yene türk tilida yézilghan bu kechmishlirining oqurmenlerge sun'ghudek halgha kélishi we ölchemlik bir kitab süpitide neshrge teyyarlinishida kitabning tehriri nurjan qara xanimning köp ejir singdürgenlikini alahide eskertip ötti.

Biz nurjan xanimdin kitabning yézilish uslubi heqqide ehwal igiliduq.

Nurjan xanim kichik pé'illiq bilen abduraxman öztürktek bir Uyghur bilen tonushqanliqidin, uning ajayip chin hékayisi we semimiy hem tebi'iy bayanlirining tunji oqurmini bolghanliqidin memnun ikenlikini bildürdi. Nurjan xanim abduraxmanning til we uslubigha bolghan bahasini bildürüp mundaq deydu: "Elwette, her adem öz ana tilida sözlerge eng bay bolidu, emma abduraxman özining türkche sewiyesi pishqan bir peytte bu kitabni yazdi. Kitabni neshrge teyyarlash jeryanida köp söhbetleshtuq. U bara-bara türkche menidash sözler ichidiki eng muwapiqini tallap ishliteleydighan boldi. Buningdin bekmu memnun boldum. Uning üstige, u bashqilardin perqlinidighan pewqul'adde sergüzeshtlirini ajayip tebi'iy we semimiy ipadiligen idi. Her bir kitabxan yazghuchining semimiyitini manga oxshashla tesirlinidighanliqigha ishinimen. Chünki uni oqughanda xuddi aptor aldingizda olturup, héchkimge anglitip baqmighan hékayilirini sözlep bériwatqandek hés qilisiz."

Rézhissor abduraxman öztürk söhbitimiz dawamida özi giriptar bolghan kalman sindromi késelliki gerche hayatqa tehdit élip kélidighan jiddiy bir késellik bolmisimu, emma bir ömür toxtatmay dorigha tayinishqa toghra kélidighanliqini, yéqinqi yillarda özide dawalashning körünerlik ünümi körülüp, hayatqa bashqiche bir yéngi ümid we ishench bilen qarawatqanliqini bildürdi. U bashqilarnimu ümidlik yashashqa ilhamlandurush meqsitide kitabigha merhum sen'etkar küresh küsenning "Küresh ölmeydu" dégen naxshisining tékistini qisturghanliqini tekitlidi.

Uyghur rézhissor abduraxman Uyghur öztürk, "Men kalman" namliq bu tunji kitabini özi üchün yéngi ghaye turghuzush we nishanlarni békitishtiki ilham menbesi dep qaraydiken. U nöwette bu kitabni Uyghur we bashqa tillargha terjime qilish we uni kino qilip ishlesh arzuliri yolida izdenmektiken.

Toluq bet