25 ياشلىق نىگارە ئابدۇشۈكۈرنىڭ كېسىۋېىتىلگەنلىكى دەلىللەندى، يېڭىھايات تۈرمىسىدە ئىكەنلىكى ئىلگىرى سۈرۈلمەكتە

مۇخبىرىمىز شۆھرەت ھوشۇر
2020-02-27
ئېلخەت
پىكىر
Share
پرىنت
تۈركىيەدە ئوقۇۋاتقان ئوقۇغۇچى زۆھرە ئابدۇمېجىتنىڭ 19 يىللىق كېسىۋېتىلگەن 25 ياشلىق نەۋرە ئاچىسى نىگارە ئابدۇشۈكۈر.
تۈركىيەدە ئوقۇۋاتقان ئوقۇغۇچى زۆھرە ئابدۇمېجىتنىڭ 19 يىللىق كېسىۋېتىلگەن 25 ياشلىق نەۋرە ئاچىسى نىگارە ئابدۇشۈكۈر.
Social Media

بۇ يىلنىڭ بېشىدا ئىجتىمائىي تاراتقۇلاردا غۇلجادىكى لاگېردا تۇتۇپ تۇرۇلۇۋاتقان 25 ياشلىق نىگارە ئابدۇشۈكۈر بىلەن ئانىسى مەرھابانىڭ 19 يىللىقتىن كېسىۋېتىلگەنلىكى ھەققىدە ئۇلارنىڭ چەتئەلدىكى ئائىلە تاۋابىئاتلىرى تەرىپىدىن 4 خىل تىلدا گۇۋاھلىق باياناتى ئېلان قىلىنغان ئىدى. مۇخبىرىمىزنىڭ ئىككى ئايدىن ئارتۇق ئېلىپ بارغان ئېنىقلاشلىرى داۋامىدا نىگارە ۋە ئانىسىنىڭ كېسىۋېتىلگەنلىكى دەلىللەندى. نۆۋەتتە مەھبۇس نىگارە ئابدۇشۈكۈرنىڭ غۇلجا شەھەرىدىكى يېڭىھايات تۈرمىسىدە جازا مۇددىتىنى ئۆتەۋاتقانلىقى ئىلگىرى سۈرۈلمەكتە.

تۈركىيەدە ئوقۇۋاتقان ئوقۇغۇچى زۆھرە ئابدۇمېجىتنىڭ ئۇيغۇرچە، تۈركچە، ئىنگىلىزچە ۋە ئەرەبچە 4 خىل تىلدا بەرگەن گۇۋاھلىق باياناتىدا دېيىلىشىچە، 25 ياشلىق نەۋرە ئاچىسى نىگارە ئابدۇشۈكۈر بىلەن 53 ياشلىق چوڭئاپىسى مەرھابا 2017 ‏-يىلى28 ‏-نويابىردا تۇتقۇن قىلىنغان ۋە لاگېرغا ئەكىتىلگەن. ئۇلار 2018 ‏-يىلنىڭ ئاخىرى 19 يىللىقتىن كېسىۋېتىلگەن. باياناتتىن مەلۇم بولۇشىچە، نىگارە ۋە ئانىسى غۇلجا شەھىرىدىكى دۆڭمەھەللىگە نوپۇسلۇق ئىكەن. 

بىز غۇلجا شەھەرلىك ئەدلىيە ئىدارىسى تەمىنلىگەن تېلېفون نومۇرلىرىغا ئاساسەن دۆمەھەللىدىكى مەلۇم بىر ئاھالىلەر رايونى ساقچى خادىمىدىن مەلۇمات سورىدۇق. بۇ خادىم ئۆزى مەسئۇل بولغان تەۋەلىكتە 19 يىللىقتىن كېسىلگەن بۇ خىل كىملىكتىكى كىشىلەرنىڭ يوق ئىكەنلىكىنى ئېيتتى. 

نىگارە ئابدۇشۈكۈر ۋە ئانىسى مەرھابا ھەققىدە ئىجتىمائىي تاراتقۇلاردا يېقىنقى ئىككى ئايدا كۆپ قېتىملاپ ئۇچۇرلار تارقالغان ۋە گۇۋاھلىق باياناتلىرى بېرىلگەن. نىگارەنىڭ گېرمانىيەدىكى ئۇرۇق-تۇغقانلىرىدىن گۈلزىرە تاشمەمەتنىڭ فېيسبۇكىدا بايان قىلىنىشىچە، نىگارە شىنجاڭ پېداگوگىكا ئونىۋېرسىتېتىنى2017 ‏-يىلى7 ‏-ئايدا پۈتتۈرگەن. ئانا تىلىدىن باشقا خىتايچە ۋە ئىنگىلىزچىنىمۇ پۇختا بىلگەن نىگارە ئابدۇشۈكۈر ئىش كۈتۈپ تۇرغان مەزگىلىدە ئاتالمىش «كەسپىي تەربىيە» گە ئېلىپ كېتىلگەن. 
تېلېفونىمىزنى قوبۇل قىلغان غۇلجا شەھىرىدىكى يەنە بىر ساقچى خادىمىمۇ ئۆزى بىلىدىغان تۇتقۇنلار تىزىملىكىدە نىگارە ئابدۇشۈكۈر ۋە مەرھابا ئىسىملىك كىشىلەرنىڭ يوقلۇقىنى بايان قىلدى. گۈلزىرە تاشمەمەتنىڭ فېيسبۇك ۋە تىۋىتتېردىكى يازما باياناتلىرىدا نىگارە ئابدۇشۈكۈرنىڭ دادىسى ئابدۇشۈكۈر مەھەممەتنىڭ غۇلجا شەھىرىدىكى روناق تاپقان تىجارەتچىلەردىن بىرى ئىكەنلىكى، ئۇنىڭ بەلگىلىك دەرىجىدە مۇقىم مۈلۈك ساھىبى ئىكەنلىكى، شۇڭا بۇ ئائىلە ئەزالىرىنىڭ خىتاينىڭ «كەسپىي تەربىيە» لەشلىرىگە ئېھتىياجى يوقلۇقى ئەسكەرتىلگەن. 

گۈلزىرەنىڭ يۇرتىدىكى تونۇشلىرىدىن ئاڭلىغانلىرىغا ئاساسەن پەرەز قىلىشىچە، نىگارە گېرمانىيەدىكى ئاكىسى بىلەن تېلېفوندا سۆزلەشكەنلىكى، ئانىسى مەرھابا بولسا 2015 ‏-يىلى تۈركىيەگە ئىككى ھەپتىلىك ساياھەتكە كەلگەنلىكى ئۈچۈن تۇتقۇن قىلىنغان ئىكەن. تېلېفونىمىزنى قوبۇل قىلغان بىر ساقچىخانا باشلىقى نىگارە بىلەن مەرھابانىڭ كېسىلگەن مۇددىتى ۋە سەۋەبى ھەققىدىكى سوئالىمىزغا جاۋاپ بېرىشنى رەت قىلىش داۋامىدا ئۇ ئىككىسىنىڭ كېسىلىپ بولغانلىقىنى دەلىللىدى. ئەمما قانچە يىللىق كېسىلگەنلىكى ھەققىدە، يۇقۇرى دەرىجىلىك خادىغلاردىن مەلۇمات ئېلىشىمىزنى تەۋسىيە قىلدى. 

تېلېفون زىيارەتلىرىمىز داۋامىدا دۆڭمەھەللىدىكى ئاھالىلەردىن بىرى نىگارە ئابدۇشۈكۈرنىڭ نۆۋەتتە يېڭىھايات تۈرمىسىدە ئىكەنلىك ئېھتىمالىقىنى ئوتتۇرىغا قويدى. تېلېفونىمىزنى قوبۇل قىلغان بىر ئەدلىيە خادىمى تىزىملىككە قاراپ چىققاندىن كېيىن نىگارە ئابدۇشۈكۈرنىڭ يېڭىھايات تۈرمىسىدە بولۇش ئېھتىماللىقىنى تەكىتلىدى. 

ھۆرمەتلىك رادىيو ئاڭلىغۇچىلار، يۇقىرىقى ئېنىقلاشلىرىمىزدىن نىگارە ئابدۇشۈكۈر ۋە ئانىسى مەرھابانىڭ كېسىۋېتىلگەنلىكى دەلىللەندى. ئەمما 19 يىللىقتىن كېسىلگەنلىكى تېخى دەلىللەنمىدى.

پىكىرلەر (0)
Share
تولۇق بەت