Rusiye, qirghizistandiki herbiy bazisida turushluq qisimlirini köpeytmekchi

2005-07-13
Élxet
Pikir
Share
Print

Rusiye herbiy da'irilirining charshenbe küni ashkarilishiche, moskwa qirghizistandiki kent hawa armiye bazisida turushluq rusiye qoshunlirining sanini ikki hesse köpeytishni oylashmaqtiken.

Kent hawa armiye bazisidiki rusiye qisimlirining qomandani wladimir mixaylow, " biz qisimlirimizni ikki hesse köpeytishni oylashmaqtimiz," dep tekitligen. Mixaylow shu küni rusiye fédératsiye kéngishigha qirghizistanda turushluq rusiye qisimlirining ehwali toghrisida doklat bergen.

Rusiye, kent hawa armiye bazisidiki qisimlirini 2003 - yili orunlashturghan bolup, mezkur bazidiki rusiye qoshuni 300 kishilik armiye bilen suxoy belgilik urush ayropilanlirini öz ichige alidu. Kent hawa armiye bazisi manas aydurumidiki amérika herbiy bazisigha bir qanche kilométir yiraqliqta bolup, manas aydurumida 2000 kishilik amérika qoshuni turidu.

Qirghizistanning yéngidin saylan'ghan prézidénti qurmanbég baqiyéw, düshenbe küni qirghizistandiki amérika qoshunlirining chékish waqti toghrisida muzakire élip bérishni telep qilghan. Baqiyéw, amérika qisimlirining chékinish waqtini tilgha almighan bolsimu, emma u "afghanistanda weziyet özgerdi, biz amérika qisimlirining qirghizistanda turush hajiti qalmighanliqini oylawatimiz," dep tekitligen.

Yéqinda shangxey guruhidiki döletler amérikini qirghizistan bilen özbékistandiki herbiy bazilardin chékinish waqit jedwili élan qilishqa qistighan. (Erkin)

Pikirler (0)
Share
Toluq bet