Issiq köl astidin qedimki medeniyet izliri tépildi

2007-12-30
Élxet
Pikir
Share
Print

Rusiye-qirghizistan alimliri issiq köl astini uzun mezgil tekshürgen bolup, 2007- yilidiki tekshürüsh netijiside köl astidin 2500 yil ilgiriki insanlar medeniyet izlirini tépip, issiq köl rayonining mezkur medeniyitining ehmiyet jehette shimaliy qara déngiz boyliridiki we ottura yer déngizi qirghaqliridiki misir medeniyetliridin qélishmaydighanliqini höküm qilishti.

Rusiyining xewerler agéntliqining tarqatqan uchuridin qarighanda, issiq köl astidiki bu medeniyetni izdeshke qatnashqan nikolay lukashéw yuqiridiki uchurni melum qilghan. Bu qétimqi tekshürüsh pa'aliyitige qirghizistan penler akadémiyisining mu'awin bashliqi wladimir ploskix we rusiye alimliridin swétlana lukashéwaning bashchiliqida rusiye su asti pa'aliyetliri élip barghuchilar jem'iyitining bir qisim ezaliri qatnashqan. Ghewwaslar köl astigha qayta -qayta chöküp, köl astini tetqiq qilip, qedimki medeniyet pakitlirini izdidi.

Ular issiq kölning shimaliy qirghaqlirida 5 métirdin 10 métirghiche bolghan us astidin uzunluqi yérim kilométirgha sozulghan sépilning izini tapqan. Bu chong bir sheherning belgisi bolup, da'irisi bir qanche kwadrat kilométir kélidu. Kölning astidin yaxshi saqlan'ghan sak dewrige mensup, buyumlar tépilghan. Bular mistin yasalghan her xil buyumlar, oqya, özini qoghdashqa ishlitidighan xenjer we bashqilardur. Hazirghiche köl astidin on nechche qel'e we ahale ponkitliri xarabisi tépilghan.

Yuqiridiki su astigha chöküp ketken medeniyet izlirining hemmisi issiq kölning shimaliy qirghaqlirigha yéqin bolup, bu yerdiki xelqler arisidimu issiq kölning astida chöküp ketken sheherler barliqi heqqidiki türlük riwayetler mewjut iken. (Ümidwar)

Pikirler (0)
Share
Toluq bet