Qirghizistan xitaylarning üzliksiz yardimige érishmekte

2004-12-24
Élxet
Pikir
Share
Print

Xitay herbiy da'iriliri yéqinda qirghizistan chégra mudapi'e qisimlirigha yene 2 milyon yü'en qimmitidiki herbiy téxnikiliq buyumlar we maddi eshyalar yardem qildi.

Ikki terep chégra mudapi'e da'iriliri 22 - dékabir küni béshkekte körüshüp, ikki dölet chégra mudapi'e qisimlirining hemkarliqini kücheytish, shundaqla 2005 - yili élip baridighan hemkarliq pa'aliyetliri boyiche söhbet élip barghan. Qirghizistan dölet axbarat agéntliqi "qabar" ning xewer qilishiche, xitay da'iriliri yardem qilghan buyumlar herbiy téxnikilik buyumlar, maddi eshyalar we alaqe eswabi qatarliqlarni öz ichige alidu. "Qabar" axbarat agéntliqi, 22 - dékabir küni béshkektiki qirghizistan chégra mudapi'e bash shtabida ötküzulgen yighin'gha, xitay tereptin général mayor shin lixu'aning qirghizistan tereptin général mayor nurdin chumoyéflarning qatnashqanliqini xewer qildi.

Bu qétimqi söhbetning sel aldida, qirghizistan hökümiti merkizi béshkektiki Uyghur ittipaqining qirghiz dölet tiyatirida ammiwi pa'aliyet ötküzüshini chekligen. Uyghur ittipaqi 17 - dékabir küni qirghizistan dölet tiyatirida mezkur teshkilat qurulghanliqining 15 yilliqini xatirilesh pa'aliyiti ötküzmekchi bolghan. Biraq qirghizistan dölet sékritari ibrahimof, qirghiz dölet tiyatirining Uyghur ittipaqigha bérilishini chekligen. Ibrahimof, ittipaq re'isi rozi memet abdulbaqiyéfning "éqim" gézitige bergen bayanatidiki "her bir Uyghur kelgüside Uyghuristan yaki sherqiy türkistanning musteqil bolidighanliqigha ishinidu," digen sözi, xitay - qirghizistan munasiwetlirini murekkepleshtüriwetti, dep körsetken. (Erkin)

Pikirler (0)
Share
Toluq bet