Қирғизистан коммунистлири милошевичқа чоқуниду

2006-03-19
Елхәт
Пикир
Share
Принт

Оттура асиядики пәрғанә агентлиқиниң учуридин қариғанда, өткән һәптә гаадики хәлқара уруш җинайәтчилири сотиниң қамақханисида сабиқ югославийә президенти милошевич туюқсиз өлгәндин кейин, 17-март күни өзини қирғизистан коммунистлар партийисиниң рәиси дәп ативалған клара аҗибәкова исимлик бир қирғиз аялниң башламчилиқида бир қанчә он адәм қирғизистан парламент бинаси алдида наразилиқ билдүрүш намайиши өткүзүп, гаадики хәлқара уруш җинайәтчилири сотини милошевичниң өлүми билән әйиблигән.

Улар милошевичниң 250 миңдин артуқ адәмниң өлүшигә сәвәб болған етник қирғинчилиқ кәлтүрүп чиқарған, косованиң мустәқиллиқи үчүн күрәш қилған мусулман албанларни қирғин қилғанлиқи үчүн сотқа тартилған серб милләтчиси икәнликини нәзиридин қалдуруп, "милошевич садиқ коммунист" дәп махтап, униңға һөрмәт билдүридикән.

Хәвәрдин мәлум болушичә, қирғизистан коммунистлири қирғизистан җумһурийитини русийә вә белорусийә билән иттипақдаш болушқа дәвәт қилидикән. Мәлуматларға қариғанда, русийә вә оттура асия җумһурийәтлиридә кишиләр арисида коммунистлардин сәскиниш кәйпияти күчийиватсиму, йәнила коммунистлар партийиси өз паалийәтлирини давамлаштурмақта. Қирғизистандики көп партийилик түзүм, коммунистларниң паалийәт елип беришиға пурсәт яритип бәргән. ( Үмидвар)

Пикирләр (0)
Share
Толуқ бәт