Хитай һөкүмити өзбекистандики бастурушни қоллиди

2005-05-24
Елхәт
Пикир
Share
Принт

Өзбекистан президенти ислам керимоф бейҗиңдики зияритини башлаштин бир күн илгири, хитай һөкүмити сәйшәнбә күни баянат елан қилип, президент керимофниң йеқинда әндиҗанда йүз бәргән хәлқ исянини бастуруш һәрикитини қоллиди. Президент керимоф хитайда елип баридиған 3 күнлүк зияритидә хитай дөләт рәиси ху җинтав, хитай баш министири вен җябавлар билән учрушиду.

Керимоф һөкүмитиниң әндиҗандики намайишни бастуруш һәрикити, хәлқара җәмийәтниң тәнқидигә учриған. Өзбекистандики кишилик һоқуқни қоғдиғучиларниң ашкарилишичә, намайишни бастуруш җәрянида 700 дин артуқ пуқра өзбек аманлиқ күчлири тәрипидин өлтүрүлгән. Әмма керимоф һөкүмити 169 киши өлди, дәп елан қилди.

Президент керимоф, аманлиқ күчлириниң пуқраларға оқ чиқарғанлиқини рәт қилип, намайишчиларни әсәбий диний унсурлар, дәп әйиблигән.

Өзбекистан даирилириниң һәрикити хитай һөкүмитиниң қоллишиға еришмәктә. Ташқи ишлар министирлиқиниң баянатчиси коң чүән, " биз өзбекистан һөкүмитиниң терорчилар, бөлгүнчиләр вә диний әсәбийләр қатарлиқ үч хил күчләргә қарши бастуруш һәрикитини қоллаймиз," деди.

Америка, өзбекистан даирилирини қоралсиз пуқраларға һәрбий күч ишлитиш, билән тәнқидлимәктә. Мутәхәссисләр, керимофниң зиярити хитайларниң қоллишиға игә болушни мәқсәд қилиду, дәп қариған. Коң чүән , оттура асиядики муқимсизлиқниң уйғур аптоном райониға қандақ тәсир көрситидиғанлиқини тилға елишни халимиди. (Әркин)

Пикирләр (0)
Share
Толуқ бәт