Xitay hökümiti özbékistandiki basturushni qollidi

2005-05-24
Élxet
Pikir
Share
Print

Özbékistan prézidénti islam kérimof béyjingdiki ziyaritini bashlashtin bir kün ilgiri, xitay hökümiti seyshenbe küni bayanat élan qilip, prézidént kérimofning yéqinda endijanda yüz bergen xelq isyanini basturush herikitini qollidi. Prézidént kérimof xitayda élip baridighan 3 künlük ziyaritide xitay dölet re'isi xu jintaw, xitay bash ministiri wén jyabawlar bilen uchrushidu.

Kérimof hökümitining endijandiki namayishni basturush herikiti, xelq'ara jem'iyetning tenqidige uchrighan. Özbékistandiki kishilik hoquqni qoghdighuchilarning ashkarilishiche, namayishni basturush jeryanida 700 din artuq puqra özbék amanliq küchliri teripidin öltürülgen. Emma kérimof hökümiti 169 kishi öldi, dep élan qildi.

Prézidént kérimof, amanliq küchlirining puqralargha oq chiqarghanliqini ret qilip, namayishchilarni esebiy diniy unsurlar, dep eyibligen.

Özbékistan da'irilirining herikiti xitay hökümitining qollishigha érishmekte. Tashqi ishlar ministirliqining bayanatchisi kong chüen, " biz özbékistan hökümitining térorchilar, bölgünchiler we diniy esebiyler qatarliq üch xil küchlerge qarshi basturush herikitini qollaymiz," dédi.

Amérika, özbékistan da'irilirini qoralsiz puqralargha herbiy küch ishlitish, bilen tenqidlimekte. Mutexessisler, kérimofning ziyariti xitaylarning qollishigha ige bolushni meqsed qilidu, dep qarighan. Kong chü'en , ottura asiyadiki muqimsizliqning Uyghur aptonom rayonigha qandaq tesir körsitidighanliqini tilgha élishni xalimidi. (Erkin)

Pikirler (0)
Share
Toluq bet