Шиветсийәдики хитай әлчиханисиға четилған зор җасуслуқ делоси вә униң баш - ахири (8)

Мухбиримиз қутлан
2015-06-11
Елхәт
Пикир
Share
Принт
Рәсимдики қолини көтүрүп турған әр бабур мәхсут, оң тәрәптики хитай аял шиветсийәдин қоғлап чиқирилған хитай аял дипломат җов лулу. 2010-Йили.
Рәсимдики қолини көтүрүп турған әр бабур мәхсут, оң тәрәптики хитай аял шиветсийәдин қоғлап чиқирилған хитай аял дипломат җов лулу. 2010-Йили.
svd.se din elinghan


8 - Қисим: печкини қурбанлиқ қилиш

2009 - Йили 6 - айниң 4 - күни 62 яшлиқ уйғур җасус стокһолмдики шәхсий туралғусида қолға елинғинида, нурғун кишиләр техи бу делониң интайин мурәккәп арқа көрүнүшидин хәвәрсиз иди.

Әйни чағда мәйли шиветсийәдә яшиғучи уйғур җамаити болсун вә яки дуняниң башқа җайлирида яшаватқан уйғурлар болсун, 62 яшлиқ уйғур җасусниң дөләт һалқиған зор җасуслуқ торидики бир «кичик печка» икәнликини ойлимиған иди.

Мәзкур дело паш қилинип, уйғур җасус тутулғанғанда вә аз кәм бир йилдин кейин шиветсийә сотида сотланғанда, нурғун кишиләр техи шиветсийә билән хитай һөкүмити оттурисида мәзкур делони чөридигән бир мәйдан «ис - түтәксиз дипломатийә уруши» ниң йүз бериватқанлиқини билмәйтти.

Ундақта, мәзкур җасуслуқ делосидики «шаһ» билән «гәрдә» ролини еливатқан сирлиқ кишиләр зади қәйәрдә? торға илинип қурбанлиқ қилинған уйғур җасус мәзкур делодики «гәрдә» му яки «печка» му?

Бу соалниң җавабини шиветсийә дөләт хәвпсизлик идарисиниң мәзкур җасуслуқ делосини тәкшүрүш гурупписидики хадимлар аридин 6 йил өткән бүгүнки күндә ашкара қилиду:

«Әмәлий әһвалға асасән биз алди билән 62 яшлиқ җасус гумандарини қолға елишни қарар қилдуқ. Җасус тутулуп, дөләт һалқиған бу зор ишпийонлуқ делосиниң дәлил - пакитлири қолға чүшкәндила андин пәрдә арқисидики кишиләргә тәдбир қолланғили болиду, дәп ойлидуқ.»

Шиветсийә уйғур комитетиниң сабиқ рәиси шундақла әйни чағда шиветсийәдә актип паалийәт елип барған уйғур зиялийси абдушүкүр муһәммәт әпәнди өзиниң узундин буян бу дело һәққидә чоңқур ойлиниш вә издиниш елип барғанлиқини тәкитләйду. У өзиниң бу һәқтики мулаһизилирини йиғинчақлап мундақ дәйду:

«Бу дело тәкшүрүш иши мениң һес қилишимчә, 2008 - йилидин бурунла башланған. Әмәлийәттә бабур мәқсут буниң ичидики бир "кичик белиқ", шиветсийә дөләт хәвпсизлик хадимлири дөләт һалқиған бу зор җасуслуқ делосидики "чоң белиқ" ларни аллиқачан сәзгән вә уларни мәхпий һалда көзитишкә башлиған. Бу җәрянда ойлимиған йәрдин бабур мәқсут торға илинип, пәрдә арқисидики "чоң белиқ" ларни ашкара қилиш үчүн уни қурбанлиқ қилишқа тоғра кәлгән.»

Шиветсийә уйғур маарип уюшмисиниң нөвәттики рәиси әхмәт турсун әпәнди әйни чағдики әһваллар һәққидә әслимә қилип, мәзкур җасуслуқ делосиниң адәттики вәқә әмәсликини, бәлки униң интайин сирлиқ ич йүзи барлиқини тәкитләйду:

«Бабур мәқсутниң сот хатирисидики учурлар нурғун сирларниң йип учини байқишимизға ярдәм бериду. Униңға ишпийонлуқ вәзиписи ескилистуна шәһиридә тапшурулған. Буниң пәрдә арқисида техи ашкара болмиған башқиму инсанларниң барлиқи мәлум. Бабур мәқсутниң әйни чағда җамаәтниң ишәнчисини қолға кәлтүрүш үчүн мәккигә берип һәҗ қилиши, җамаәткә көрситип намаз оқуши, оғлиға сақал қойдуруп бизниң маарип уюшмисиға әвәтишидәк бир қатар деталлар униң җасуслуқ саһәсидә наһайити бурунла пишқан бир киши икәнликини көрсәтмәктә…»

Шаһитлардин қурбанҗан мудашму 62 яшлиқ җасус тутулушниң алди - кәйнидә шиветсийә дөләт бихәтәрлик хадимлириниң җасус гумандари билән телефон алақиси қилғанлики барлиқ уйғурлар билән айрим - айрим сөзләшкәнликини тилға алиду.

Стокһолм шәһәрлик сот мәһкимиси 62 яшлиқ җасус гумандарини сотлиғанда, униң хитай һөкүмитиниң чегра сиртида уюштурған зор җасуслуқ оператсийәсигә ахбарат йәткүзүш үчүн сетивелинғанлиқини җәзмләштүриду:

«Қолға чүшкән дәлил - пакитлар шуни көрсәттики, мәзкур җасуслуқ делосиниң пәрдә арқисида җуңго һөкүмитиниң қоли барлиқи ашкара болди. Йәни улар иккинчи бир дөләттики пуқраларни җасуслуқ үчүн сетивелип, өзлириниң йәр асти ахбарат топлаш һәрикитигә қатнаштурған.»

Абдушүкүр муһәммәт әпәнди 2000 - йилларниң башлиридин етибарән өзиниң шиветсийәдә яшаш, сиясий паалийәтләргә қатнишиш һәмдә шиветсийә уйғур комитетиниң рәислик вәзиписини өтәш җәрянида көргән - билгәнлири билән мәзкур делоға мунасивәтлик материялларни өз - ара бағлап, бабур мәқсутниң мәзкур делодики «қурбанлиқ қилинған бир печка» икәнликини илгири сүриду.

(Сәккизинчи қисми түгиди, давами бар)

Пикирләр (0)
Share
Толуқ бәт