Шиветсийәдики хитай әлчиханисиға четилған зор җасуслуқ делоси вә униң баш-ахири (6)

Мухбиримиз қутлан
2015-05-22
Елхәт
Пикир
Share
Принт
Сүрәттә, җасус гумандари бабур мәхсутниң 2009 - йили май ейида вашингтонда ечилған д у қ ниң йиғини җәрйанида өткүзүлгән хитай әлчиханиси алдидики намйишқа қатнишиватқан күрүнүш болуп, җасус гумандари бабур мәхсут оңдин иккинчи киши.
Сүрәттә, җасус гумандари бабур мәхсутниң 2009 - йили май ейида вашингтонда ечилған д у қ ниң йиғини җәрйанида өткүзүлгән хитай әлчиханиси алдидики намйишқа қатнишиватқан күрүнүш болуп, җасус гумандари бабур мәхсут оңдин иккинчи киши.
RFA Photo

6-Қисим: йәмчүк ташлап ахбарат елиш

Ескилистуна - шиветсийәдики нопуси аран 80 миңдин ашидиған бир кичик шәһәр. Һалбуки, 2000 - йилларниң башлирида бу кичик шәһәрдә уйғурларниң сиясий паалийәтлири җуш уруп раваҗлиниду.

Шу йилларда мәрһум сәнәткар вә сиясий паалийәтчи күрәш күсән әпәнди бу шәһәрдә шиветсийә уйғур комитетини қуруп чиқиду. «Ғәрб шамили» намлиқ уйғурчә журнал чиқириду. Уйғурчә тор радийоси тәсис қилип аңлитиш бериду. Уйғурларни тәшвиқ қилидиған сиясий, мәдәний паалийәтләр вә сәнәт консертлири өткүзилиду.

2007 - Йилиниң күз күнлири хитай һөкүмити «уйғур аптоном районлуқ нахша - уссул өмики» намида бир тәшвиқат әтрити тәшкилләп явропаға әвәтиду. Уйғур аптоном районлуқ партком тәшвиқат бөлүминиң ли фамилилик башлиқи йетәклигән бу өмәк алди билән шиветсийәгә йетип келиду.

Өмәк келиштин бурун 62 яшлиқ уйғур җасус стокһолмдики хитай әлчиханисиниң көрсәтмиси билән бу учурни йәмчүк һесабида шиветсийә уйғур комитетиға йәткүзиду.

Шиветсийә уйғур комитетиниң әйни вақиттики рәиси абдушүкүр муһәммәт, баш катипи абдушүкүр самсақ һәмдә даимий һәйити қурбанҗан мудаш қатарлиқлар уйғур җасусниң бу хәвәрни өзлиригә йәткүзгәнлики һәққидә гуваһлиқ бериду.

Уйғур аптоном районлуқ нахша - уссул өмикиниң шиветсийәгә келиши һәққидики интайин тәпсилий учур әйни чағда тәшкилат мәсуллирини һәйран қалдуриду вә 62 яшлиқ бу сирлиқ кишигә болған дәсләпки гуманини қозғайду.

Җасус гумандари әйни чағда «нахша - уссул өмики» намидики хитай тәшвиқат әтритиниң шиветсийәдики паалийәт учурини немә ғәрәз билән уйғур тәшкилатиға йәткүзиду? аталмиш «шинҗаң нахша - уссул өмики» немә үчүн тунҗи мәйдан консертини шиветсийә пайтәхти стокһолмда әмәс, бәлки кичик шәһәр ескилистунада қойиду?

Абдушүкүр муһәммәт әпәнди аридин 8 йил өткәнки бүгүнки күндә өз әслимиси билән бу соалға җаваб бериду. У хитайниң әйни чағда «уйғур нахша - уссул өмики» тәшкилләп, биринчи мәйдан оюнни шиветсийә пайтәхти стокһолмда әмәс, бәлки нопуси 80 миңчә келидиған ескилистуна шәһиридә қоюшиниң рошән сиясий мәқсити барлиқини тәкитләйду. Шундақла әйни чағда 62 яшлиқ җасус гумандаридин башқа, йәнә ескилистуна шәһиридә бир қисим сирлиқ инсанларниң хупиянә һәрикәтлириниңму болғанлиқини тәстиқлайду.

Шаһитларниң әслимилири шуни көрсәттики, 2005 - йилиниң алди - кәйнидила җасус гумандари ескилистуна шәһиригә көп қетим берип мәрһум күрәш күсән әпәндигә йеқинлишиш вә униң ишәнчисини қолға кәлтүрүшкә тиришқан. Абдулла көкяр әпәндиму бу нуқтини алаһидә әскәртиду.

Шиветсийә дөләт хәвпсизлик идарисиниң 62 яшлиқ уйғур җасусниң делоси һәққидә һазирғичә ашкара қилған учурлири шундақла стокһолм шәһәрлик сот меһкимисиниң бу һәқтики сот хатириси мундақ бир нуқтини җамаәтчиликкә әскәртиду:

2007 - Йилиниң яз мәзгилидә ескилистуна шәһиридә ойналған сирлиқ «тиятер» ларниң пәрдиси хитай һөкүмити әвәткән «нахша - уссул өмики» ниң шиветсийәгә келиши билән ечилған. Бу «тиятер»да 62 яшлиқ уйғур җасус билән бир вақитта йәнә, пәрдә арқисида рол алғучиларму мәвҗут!

(6 - Қисми түгиди, давами бар)

Пикирләр (0)
Share
Толуқ бәт