Шиветсийәдики хитай әлчиханисиға четилған зор җасуслуқ делоси вә униң баш-ахири (7 A)

Мухбиримиз қутлан
2015-06-03
Елхәт
Пикир
Share
Принт
Ситокһолмдики уйғурларниң хитайға қарши намайишини көзитип турған җасус – бабур мәхсут (истәрилкида көрситилгән қара көзәйнәк тақиған киши).
Ситокһолмдики уйғурларниң хитайға қарши намайишини көзитип турған җасус – бабур мәхсут (истәрилкида көрситилгән қара көзәйнәк тақиған киши).
Sherqiy Türkistan Teshwiqat Merkizi

7-Қисим (а): җасусниң түгимәс пули

2009-Йили 4-июнда ситокһолмда яшиғучи 62 яшлиқ уйғур җасус гумандари қолға елинғанда униң кийим ишкапидин чиққан 110 миң шивет кирони нәқ пул нурғун кишиләрни һәйран қалдурған иди.

Шиветсийәгә кәлгәндин буян һечқанчә ишлимигән вә баҗ тапшурмиған, дөләтниң иҗтимаий параванлиқ пулиға тайинип яшиған шундақла муддәттин бурун кесәллик пенсийәси еливатқан бу йочун адәмниң янчуқидики шунчә көп нәқ пул нәдин кәлгән?

Җасус тутулуп бир йил болмайла ситокһолм шәһәрлик сот мәһкимиси тәйярлиған «8976-09б» номурлуқ сот хатирисидә мундақ бир қорқунчлуқ сан кишиләрни техиму һәйран қалдуриду!

«Уйғур җасусниң әйни чағда хитай һөкүмити тәрипидин мусадирә қилинған мәнбәси ениқ болмиған 7 милйон йүән пули болған. Әгәрдә у чәтәлләрдики уйғур тәшкилатлири вә уларниң ғоллуқ рәһбәрлириниң учурлирини хитайға тәминләп берәлисә, хитай җасуси лей да униңға хитайдин бу пулни елип беридиғанлиқи һәққидә вәдә бәргән.»

Шиветсийә дөләт хәвпсизлик хадимлири 62 яшлиқ уйғур җасус билән лей да, йәни «хәлқ гезити» ниң скандинавийә әллиридә турушлуқ алаһидә мухбири дегән нам билән шиветсийәдә ахбарат топлаватқан хитай офитсерниң сөһбитини мәхпий аңлаш җәрянида бу учурни қолға чүшүриду. Бу һәқтә шиветсийә дөләт хәвпсизлик идарисиниң җасуслуққа қарши мутәсәссиси вилһелм унге мунбуларни билдүриду:

«Биз уларниң мәхпий сөһбитини аңлаш җәрянида уларниң бирқанчә қетим җуңго пули һесабида 7 милйон йвәнниң гепини талаш-тартиш қилишқанлиқини аңлидуқ. Бу зор соммилиқ пул һәққидики детал бизниң диққитимизни чәкти.»

Шиветсийә дөләт радиоси бу йил мартта тарқатқан бу һәқтики мәхсус радио программисидиму уйғур җасусниң хитай алаһидә хадими лей даға өзиниң хитайдики 7 милйон йүән пулини қайтуруп елиш тәлипини қойғанлиқини тилға алиду:

«62 яшлиқ җасус гумандари мухбир қияпитигә киривалған хитай ишпиюни билән биринчи қетим көрүшүштила өзиниң 7 милйон йүән пулини хитайдин қайтуруп елиш тәлипини оттуриға қойған. Аталмиш ‹мухбир' өзиниң бейҗиңдики ‹хәлқ гезити' дә ишләйдиған башлиқи билән бу һәқтә сөзлишидиғанлиқини, униң бу ишни һәл қилишқа күчи йетидиғанлиқини ейтқан.»

Ситокһолм шәһәрлик сот мәһкимисиниң 62 яшлиқ уйғурниң җасуслуқ делоси һәққидә 2010-йили 8-мартта чиқарған сот хатирисидики мундақ бир нуқта кишиләрни техиму чөчүтиду:

«Хитай дөләт хәвпсизлик министирлиқиниң ‹мухбир' қияпитигә киривалған алаһидә хадими лей да 62 яшлиқ уйғур җасусқа хитайда қалған 7 милйон йүән пулини елип беришкә вәдә бәргән. Һалбуки, лей да хитайдин 7 милюнни қайтуруп әкәлгәндә бу пулниң тәхминән 10-20% өзи алидиғанлиқи һәққидә уйғур җасус билән келишим һасил қилған.»

Сот хатирисидики бу баянлар, хитай җасуслириниң икки йүзини, йәни уларниң сиясий җәһәттин хитайниң мәнпәити үчүн ишлисиму, лекин иқтисадий җәһәттин өз янчуқи үчүн ишләйдиғанлиқини, чоң җасусларниң йәмчүк ташлап кичик җасусларни қақти-соқти қилидиғанлиқини ашкара қилған.

62 яшлиқ уйғур җасусниң юқириқи зор соммилиқ түгимәс пуллиридин башқа, йәнә дуня уйғур қурултийиға 100 миң явро пул ярдәм қилмақчи болғанлиқидәк деталларму шиветсийә сотида ашкара болиду.

Сәпо хадимлири җасусниң кәйнигә чүшүп мәхпий тәкшүрүш вә униң телефон алақисини аңлаш җәрянида, униң муһаҗирәттики уйғурларниң әң чоң сиясий тәшкилати болған дуня уйғур қурултийиға 100 явро пул бәрмәкчи болғанлиқидәк учурни қолға чүшүриду. Сәпо хадимлири тәминлигән бу учурға асасән шиветсийә соти уйғур җасусниң делосида бу нуқтини айдиңлаштурушқа көп күчәйду.

Шиветсийә уйғур комитетиниң сабиқ рәиси абдушүкүр муһәммәт әйни чағда өзиниң ситокһолм шәһәрлик сот мәһкимисидә өткүзүлгән мәзкур сотни яндин аңлиғанлиқини, сотта дәл мушу мәсилиниң нуқтилиқ соралғанлиқи һәққидә өз әслимиси билән гуваһлиқ бериду.

Нөвәттә шиветсийә маарип уюшмисиниң рәислик вәзиписини өтәватқан әхмәт турсун әпәндиму, әйни чағда 62 яшлиқ җасусниң миңлап явро ианә қилип, һәм дуня уйғур қурултийиниң һәм шиветсийәдики уйғур тәшкилатлириниң көзини ғәләт қилғанлиқини әсләйду.

(7-Қисимниң беши түгиди, давами бар)

Пикирләр (0)
Share
Толуқ бәт