Хотәнниң тусула йеза пәйшәнбә базирида сақчилар билән амма арисида маҗира йүз бәргән

Мухбиримиз шөһрәт һошур
2014-02-27
Елхәт
Пикир
Share
Принт
Пичан лүкчүн вәқәсидин кейин сақчилар ахбарат орунлириниң рәсимгә тартишини тосуватқан көрүнүш. 2013-Йили 27-июн, пичан.
Пичан лүкчүн вәқәсидин кейин сақчилар ахбарат орунлириниң рәсимгә тартишини тосуватқан көрүнүш. 2013-Йили 27-июн, пичан.
AFP

Бүгүн иҗтимаий таратқулардин фейсбокта баян қилинишичә, хотәнниң тусула йеза пәйшәнбә базирида хитай сақчилири аммиға қаритип яш аққузғучи бомба атқан, әтраптики кичик балилар вә яшанғанлар бәлгилик дәриҗидә зәхимләнгән.

Әмма фейсбоктики бу учурда вәқәниң келип чиқиш сәвәби һәққидә мәлумат берилмигән. Мухбиримиз бүгүн йип учиға асасән хотәнниң тусула сақчиханиси вә йәрлик аһалиләргә телефон қилип әһвал һәққидә мәлумат игилиди.

Сақчилар мухбириниң соалидин өзини қачуруш арқилиқ, вәқәни йошурушқа тиришқан болсиму, аһалиләрдин бири, бүгүн пәйшәнбә базарда сақчиларниң рәсмийәтсиз мотсиклитларни йиғиш җәрянида амминиң наразилиқиға учрап қоршавда қалғанлиқини вә аммиға яш аққузғучи бомба етиш арқилиқ қоршавдин қутулғанлиқини ашкарилиди.

Биз аввал хотәнниң тусула йезилиқ сақчиханисиға телефон қилдуқ.

Хадим : тусула сақчиханиси!
Мухбир: тусулада һазир вәзийәт қандақ?
Хадим: мушу соалиңизни башлиқимиздин сораң, телефонни муавин соҗаңға бәрдим.
Мухбир: сиз муавин сақчихана башлиқиму?
Хадим: һә, мән шу.
Мухбир: бүгүн вәқә йүз бәргән йәргә бардиңизму?
Хадим: яқ. Мән бармидим.
Мухбир: бүгүн пәйшәнбә базарда йүз бәргән немә вәқә у?
Хадим: билмәйтимән.
Мухбир: вәқә билдүрүшкә тегишлик әмәсму яки сизниң вәқәдин хәвириңиз йоқму?
Хадим: бу соални ғәйрәт соҗаңдин сораң.

Мухбир: ғәйрәт, бүгүн пәйшәнбә базарда йүз бәргән немә вәқә у?
Хадим: һеч вәқә йүз бәрмиди, ичип-ойнап йүрүптимиз мана.
Мухбир: мотсиклитчилар билән араңларда бир иш болмидиму?
Хадим: немә? немә дедиңиз? мән аңлиялмидим, немә болди бу телефон....
Мухбир: гәп қилиң, мән сизниң гепиңизни аңлаватимән, сизму һазир аңлиялаваттиңиз......
Хадим: вәй, вәй.......

Бүгүн пәйшәнбә базарда нәқ мәйданда болған вәқәни көргәнләрдин бири соаллиримизға җаваб бәрди.

Мухбир: бүгүн пәйшәнбә базарда вәқә йүз бәргәндә сизму барму?
Аһалә: бар, мениңму мотсиклитимни тартип әкетип, җәриманә төләп елип кәлдим.
Мухбир: вәқә шу мотсиклитларни тәкшүрүштин келип чиққан охшимамду?
Аһалә: шундақ, бу базарға бәк җиқ адәм келиду, һәр пәйшәнбә сақчилар рәсмийәтсиз мотсиклитларни тәкшүрүп тутиду. Бүгүнму шундақ қилған.
Мухбир: сақчилар яш аққузғучи бомба атти дәп аңлидуқ, бу гәп тоғриму?
Аһалә: шундақ қилмай амали йоқти, болмиса унчивала кишиләрниң арисидин қечип чиқип кетәлмәйтти.
Мухбир: ундақта, сақчилар амминиң қоршавида қалған охшимамду?
Аһалә: шу, шундақ болди. Мотсиклитлирини тартип әкитивәргәндин кейин, мотсиклитни алғили барса җәриманә қоюлувәргәндин кейин, кишиләр ғәзәпкә келип болған иш.
Мухбир: вәқәдә өлгән, яриланған яки тутулғанлар болдиму?
Аһалә: у ишларни билип кетәлмидим, мотсиклитимни хапилиқида.
Мухбир: вәқә пәйшәнбә базарға маңидиған йолда йүз бәрдиму, яки базарниң өзидиму?
Аһалә: базарниң оттурида.

Юқирида хотәнниң тусула йезисиниң пәйшәнбә базирида сақчилар билән амма арисида маҗира келип чиққанлиқи һәққидә мәлумат аңлаттуқ.

Пикирләр (0)
Share
Толуқ бәт