Хитай һөкүмити истанбулдин чақиртип елип кәткән бир қисим уйғурларниң қамап қоюлғанлиқи ашкара болди

Ихтиярий мухбиримиз арслан
2019-05-27
Елхәт
Пикир
Share
Принт
Һазир истанбулда яшаватқан аминә мәмтимин ханимниң ери, балилири вә инисиниң рәсими. 2019-Йили-5-ай-истанбул.
Һазир истанбулда яшаватқан аминә мәмтимин ханимниң ери, балилири вә инисиниң рәсими. 2019-Йили-5-ай-истанбул.
RFA/Arslan

Хитай даирилири истанбулда яшаватқан бир қисим уйғурларға телефон арқилиқ тәһдит селип елип кәткәнлики, улар қайтип барғанда түрмигә солап қойғанлиқи ашкара болди.

Булардин бири 22 яшлиқ абликим мәмтимин болуп, у хотән вилайити лоп наһийәсиниң җия йеза 4-кәнт 4-мәһәллисидин икән. Униң бир қоли мейип болуп, давалиниш үчүн 2016-йили 2-айда истанбулға кәлгән икән. У истанбулда давалиниш җәрянида хотәндики сақчилар униң дадисиға бесим қилип оғлини қайтуруп келишкә зорлиған. Абликим мәмтимин қайтип барғандин кейин дадиси билән иккийләнни тутуп түрмигә қамиғанлиқи мәлум болди.

Һазир икки балиси билән истанбулда яшаватқан абликимҗан мәмтиминниң ачиси аминә мәмтимин зияритимизни қобул қилип, аилисиниң бешиға кәлгән паҗиәләрни аңлатти. Униң билдүрүшичә, униң йолдиши, ата-аниси, иниси вә анисиниң 5 ака-иниси, икки ачисиниң йолдашлири болуп нурғун киши һазир түрмидә яки йиғивелиш лагерида икән.

Аминә мәмтимин ханимниң билдүрүшичә, униң 22 яшлиқ иниси абликим мәмтимин истанбулда давалиниватқан мәзгилдә сақчилар униңға телефон қилип истанбулдин дәрһал қайтип келишни, әгәр қайтип кәлмисә дадисини түрмигә солайдиғанлиқини билдүрүп тәһдит салған икән. Буни аңлиған абликим дадисиниң түрмигә қамилишидин әндишә қилип истанбулдики давалинишни тохтитип юртиға қайтип кәткән икән. Бирақ у хотәнгә қайтип барғинида сақчилар уни дадиси билән қошуп түрмигә солиған.

Аминә мәмтимин ханим мундақ деди: «мениң 8 қериндишим вә 5 балам бар иди. Мән 2016-йили 1-айниң 30-күни бәшинчи пәрзәнтимни түркийәдә туғуш үчүн йолдишим билән бир баламни елип истанбулға кәлгән идим. Икки балам һазир истанбулда мениң йенимда туруватиду, қалған үч пәрзәнтим юртта иди, йолдишим юртта қалған пәрзәнтлиримизни елип келиш үчүн юртқа кәткән иди. Кейин сүрүштә қилсам йолдишимни сақчилар тутуп 15 йиллиқ қамақ җазасиға һөкүм қилипту. Униң һазир үрүмчидә бир түрмидә икәнликидин хәвәр таптим.»

Аминә мәмтиминниң билдүрүшичә, аниси тунисахан 2016-йили 5-айда түркийәгә зиярәткә кәлгән болуп, шу йили 9-айда юртиға қайтип кәткәндин кейин тутқун қилинип, 10 йиллиқ қамақ җазасиға һөкүм қилинған икән. У анисиниң һазир хотән ласкуйдики түрмидә икәнликидин хәвәр тапқан.

Аминә ханимниң билдүрүшичә иниси абликим «қуран кәрим» ни толуқ ядқа алған қари болуп, сақчилар униң түркийәгә барғанлиқ һәм «қуран кәрим» ни ядқа алғанлиқи сәвәбидин түрмигә қамиған икән. Аминә ханим аниси, дадиси, акиси вә иниси абликим болуп аилисидики қанчилиған кишиләрниң тутқун қилинип, 10 йиллиқтин қамақ җазасиға һөкүм қилинғанлиқи вә түрмиләргә қамалғанлиқидин хәвәр тапқанлиқини билдүрди. Аминә ханимниң юртта қалған 3 балиси илгири сиңлисиниң өйидә қалған болуп, һазир уларниң қәйәрдә икәнликини билмәйдикән.

Аминә ханим аилисиниң бешиға кәлгән паҗиәләрни баян қилип, пүткүл дуня җамаитини уйғурларға көңүл бөлүшкә, түрмә вә лагерлардики уйғурларниң қутулуши үчүн ярдәм қилишқа чақириқ қилди.

Пикирләр (0)
Share
Толуқ бәт