Гуаңдуңда хитайларниң уйғурларни урғанлиқини торда елан қилған 3 хитай пуқраси қолға елинди

Хитай гуаңҗу шәһиридә хитай пуқралириниң уйғур тиҗарәтчиләрни урғанлиқини торда елан қилған 3 хитай пуқрасини қолға елип, "питнә - иғва тарқитиш" билән әйиблигән.
Мухбиримиз әркин
2009-12-30
Елхәт
Пикир
Share
Принт

Хәвәрләргә қариғанда, сәйшәнбә күни 4 нәпәр тиҗарәтчи кийим - кечәк сетивалмақчи болуп, гүаңҗу шәһириниң бейҗиң йолидики бир кийим - кечәк дукиниға киргән вә бу җәрянида хитай дукандар билән тиҗарәтчиләр арисида тоқунуш йүз бәргән. Қолға елинған 3 нәпәр хитай пуқраси торда елан қилған бу һәқтики учурида әтрапдики хитайларниң дукандарға ян бесип, бу 4 нәпәр уйғур тиҗарәтчини топлишип урғанлиқини илгири сүргән иди.

Лекин шинхуа ахбарат агентлиқи бу һәқтики хәвиридә, һуҗумға учриғучиларниң уйғур әмәслики, уларниң қазақистан вә русийилик тиҗарәтчиләр икәнликини илгири сүргән. Шинхуа агентлиқиниң хәвиридә, мәсулийәт бу 4 кишигә артилған болуп, уларниң бир бәлвағни тиқивалғанлиқи, дукандарниң уларни тосивелип, икки бихәтәрлик хадиминиң вәқәгә арилашқанлиқи, икки тәрәп арисида тоқунуш йүз бәргәнлик сәвәби пуқраларниң тамаша көрүш үчүн топлашқанлиқи, җ х даирилириниң тәрәпләрни әтраптики сақчиханиға елип кәткәнлики илгири сүрүлгән.

Хәвәрләргә қариғанда, вәқәни өз көзи билән көргәнликини илгири сүргән чен фамилилик бир йолучи билән йәнә икки хитай пуқраси бу вәқәни тор бетидә елан қилип, хитай шәһәр аһалиси вә бихәтәрлик хадимлириниң бу 4 уйғурни топлишип урғанлиқини илгири сүргән. Сақчилар болса бу 3 хитай пуқрасини қолға елип, уларни "питнә - иғва тарқитиш" билән әйиблигән.

Бу йил 6 ‏- айда гуаңдуңниң шавгүән шәһиридә йүз бәргән 26‏ - июндики уйғур ишчиларни өлтүрүш вәқәси, үрүмчидә "5 ‏- июл вәқәси"ниң йүз беришини кәлтүрүп чиқарған иди. Хитай һөкүмити шуниңдин буян хитайларниң уйғурларға һуҗум қилғанлиқиға даир вәқәләрни мәтбуат йүзидә елан қилишни қәтий чәклигән.

Пикирләр (0)
Share
Толуқ бәт