Gu'angdungda xitaylarning Uyghurlarni urghanliqini torda élan qilghan 3 xitay puqrasi qolgha élindi

Xitay gu'angju shehiride xitay puqralirining Uyghur tijaretchilerni urghanliqini torda élan qilghan 3 xitay puqrasini qolgha élip, "pitne - ighwa tarqitish" bilen eyibligen.
Muxbirimiz erkin
2009-12-30
Élxet
Pikir
Share
Print

Xewerlerge qarighanda, seyshenbe küni 4 neper tijaretchi kiyim - kéchek sétiwalmaqchi bolup, güangju shehirining béyjing yolidiki bir kiyim - kéchek dukinigha kirgen we bu jeryanida xitay dukandar bilen tijaretchiler arisida toqunush yüz bergen. Qolgha élin'ghan 3 neper xitay puqrasi torda élan qilghan bu heqtiki uchurida etrapdiki xitaylarning dukandargha yan bésip, bu 4 neper Uyghur tijaretchini topliship urghanliqini ilgiri sürgen idi.

Lékin shinxu'a axbarat agéntliqi bu heqtiki xewiride, hujumgha uchrighuchilarning Uyghur emesliki, ularning qazaqistan we rusiyilik tijaretchiler ikenlikini ilgiri sürgen. Shinxu'a agéntliqining xewiride, mes'uliyet bu 4 kishige artilghan bolup, ularning bir belwaghni tiqiwalghanliqi, dukandarning ularni tosiwélip, ikki bixeterlik xadimining weqege arilashqanliqi, ikki terep arisida toqunush yüz bergenlik sewebi puqralarning tamasha körüsh üchün toplashqanliqi, j x da'irilirining tereplerni etraptiki saqchixanigha élip ketkenliki ilgiri sürülgen.

Xewerlerge qarighanda, weqeni öz közi bilen körgenlikini ilgiri sürgen chén famililik bir yoluchi bilen yene ikki xitay puqrasi bu weqeni tor bétide élan qilip, xitay sheher ahalisi we bixeterlik xadimlirining bu 4 Uyghurni topliship urghanliqini ilgiri sürgen. Saqchilar bolsa bu 3 xitay puqrasini qolgha élip, ularni "pitne - ighwa tarqitish" bilen eyibligen.

Bu yil 6 ‏- ayda gu'angdungning shawgüen shehiride yüz bergen 26‏ - iyundiki Uyghur ishchilarni öltürüsh weqesi, ürümchide "5 ‏- iyul weqesi"ning yüz bérishini keltürüp chiqarghan idi. Xitay hökümiti shuningdin buyan xitaylarning Uyghurlargha hujum qilghanliqigha da'ir weqelerni metbu'at yüzide élan qilishni qet'iy chekligen.

Toluq bet