Yazghuchi we tetqiqatchi abduréhim abletxan ötken yili 40 kün solap qoyulghan

Yazghuchi we tetqiqatchi abduréhim abletxan özining nadir maqaliliri we bir qisim edebiy xatiriliri bilen Uyghur élida we muhajirettiki Uyghurlar arisida tonulghan qelemkeshlerdin béridur.
Muxbirimiz shöhret hoshur
2010-11-30
Élxet
Pikir
Share
Print
Qumulning sheher ichi yéza jigde quduq kentide olturushluq yazghuchi we tetqiqatchi abduréhim abletxan, özining "chénggiz aytmatopqa ochuq xet" we " junggoluqlarning sapasi" qatarliq nadir maqaliliri we bir qisim edebiy xatiriliri bilen Uyghur élide we muhajirettiki Uyghurlar arisida tonulghan qelemkeshlerdin biridur. Ötken yili 5 ‏-iyul weqesidin kéyin, Uyghur jem'iyitining jiddiy we sezgür mesililiri üstide qelem tewritip kéliwatqan yazghuchi we tetqiqatchilar, xitay hökümitining nuqtiliq nazaret we jazalash obyéktigha aylan'ghan. Buning bilen abduréhim abletxanning weten ichi-sirtidiki bir türküm kitabxan we qelemdashliri uning nöwettiki teqdiri heqqide endishige chüshken؛ yéqinda Uyghurche torbetlerdin biride abduréhim abletxanning nöwette qamaqta ikenliki heqqide xewer chiqqan idi.

Muxbirimizning birqanche kündin béri qumul wilayitidiki alaqidar idare we organlar we abduréhim abletxanning mehelle-koyliridin igellishiche, uning 5 ‏-iyul weqesidin kéyin, bir qétim tutup kétilip, 40 kün qamap qoyulghanliqi we arqidin qoyup bérilgenliki؛ nöwette jigde quduq kentide normal yashawatqanliqi melum boldi. Yazghuchi abduréhim abletxan 5 ‏-iyul weqesining aldida aptonom rayonluq ma'arip nazaritigha ochuq xet yézip, nazaretning ma'arip islahati layihisige qarita teklip pikirler sun'ghan we qosh tilliq ma'arip siyasitining selbiy nuqtilirini körsitip ötken idi. Abduréhim abletxanning bultur 40 kün qamap qoyulishigha konkirt qaysi yazmisining seweb bolghanliqi hazirche melum emes.
Toluq bet