Хитай армийиси америка - җәнубий корийә һәрбий маневирини әйиблиди

Хитай армийиси пәйшәнбә күни америка билән корийә сериқ деңизда елип баридиған иккинчи нөвәтлик һәрбий маневирни әйибләп, хитай армийисиниң буниңға лайиқ җаваб қайтурудиғанлиқини билдүрди.
Мухбиримиз ирадә
2010-08-12
Елхәт
Пикир
Share
Принт

Бирләшмә агентлиқиниң хәвәр қилишичә, хитайниң "хәлқ азадлиқ армийиси гезити" бүгүнки баш мақалисидә " хитай һәрқандақ бир башқа дөләт парахот вә айропиланлириниң деңиз тәвәйимизгә йеқин җайларда һәрикәт қилишиға қарши, бу дөлитимизниң хәвпсизликигә тәһдит пәйда қилғанлиқ" дегән.

Баш мақалидә йәнә "әгәр бир ким бизгә зиян йәткүзмисә, бизму зиян йәткүзмәймиз. Кимки бизгә зиян йәткүзидикән, бизму униңға зиян беримиз" дегәндәк тәһдит ибарилириму ишлитилгән.

Хитай даирилири америка вә корийиниң сериқ деңиздики һәрбий маневириға изчил қарши туруп кәлмәктә. Хәвәрдә билдүрүлүшичә, һәрбий маневирға қатнишидиған җорҗ вашингтон авиаматкисиниң америкиниң тенч окяндики қудритиниң символи болуши вә униңдики ф - 18 типлиқ күрәшчи айропиланлириниң бейҗиң әтрапида учуп йүрүш еһтималлиқи хитайни қаттиқ териктүрмәктә икән.

Америка авиаматкисиниң җәнубий корийә билән сериқ деңизда вә шундақла вейтнам билән игилик һоқуқ мәсилиси болған җәнубий җуңго деңизида тохтиши америка билән хитай арисидики кәйпиятни җиддийләштүрүвәткән иди. Бу сәвәблик йеқинда америкида зиярәттә болмақчи болған хитай дөләт рәиси ху җинтавниң америка зияритини кечиктүрүдиғанлиқи еһтималға йеқин көрүнмәктә.

Америка билән җәнубий корийиниң сериқ деңизда елип баридиған иккинчи нөвәтлик һәрбий маневирниң ениқ вақти техи бекитилмигән болсиму, әмма униң алдимиздики һәптә ичидә елип берилиши мумкинлики билдүрүлмәктә.

Пикирләр (0)
Share
Толуқ бәт