Amérika xelq'ara diniy erkinlik komitéti klinton xanimdin xitay bilen diniy erkinlik mesilisini sözlishishni telep qildi

Amérika xelq'ara diniy erkinlik komitéti jüme küni bayanat élan qilip, amérika dölet ishlar ministiri hélari klinton xanimdin shenbe küni xitayda élip baridighan qisqa muddetlik tuyuqsiz ziyaritide uniwérsal kishilik hoquq we diniy erkinlik mesilisini otturigha qoyushni telep qildi.
Muxbirimiz erkin
2010-10-29
Élxet
Pikir
Share
Print

Bayanatta, xitay dölet re'isi xu jintawning yéqindin buyan dinning jem'iyettiki roli heqqide ijabiy bayanlarda bolushigha qarimay, xitayda diniy erkinlik weziyiti dawamliq nacharlashqanliqini, bolupmu tibet we Uyghurlarning diniy erkinlik weziyiti nahayiti éghirliqini, bu rayonlarda 2008‏ - we 2009‏ - yili yüz bergen weqelerdin kéyin diniy jama'etlerge qaritilghan kontrolluq küchiyip, diniy erbablar we hökümetke boyuntawliq qilghuchi dep qaralghan shexslerning qolgha élin'ghan hem türmige tashlan'ghanliqini bildürgen.

Mezkur bayanat amérika dölet ishlar ministiri klinton xanimning shenbe küni xitayni qisqa muddetlik ziyaret qilip, xitay dölet ishlar komissari dey binggo bilen ikki tereplimilik we istratégiyilik mesililer boyiche söhbet élip bérishning harpisida élan qilindi.

Bayanatta, xelq'ara diniy erkinlik komitétining re'isi lé'onard lé'oning sözini neqil keltürüp, " biz klinton xanimni shenbe küni ötküzülidighan söhbette, amérikining kishilik hoquq we diniy erkinliktiki yétekchilik rolini éniq ipadileshke chaqirimiz " dégen.

Xewerlerdin melum bolushiche, klinton shenbe küni xitayda yene béyjing terep bilen xu jintawning kéler yili 1‏ - ayda élip bérilidighan amérika ziyaritini muzakire qilidiken.

Xelq'ara diniy erkinlik komitétining bayanatida komitét re'isi lé'onard lé'o yene eskertip, " xitayda kishilik hoquq depsendichilikining yüz bérish sani we kölimi kishini heyran qalduridu. Xitay uniwérsal erkinlikni süyi'istimal qilish, jümlidin milyonlighan tinchliqperwer dindarlarni basturushni dawamlashtursa, bu qoshnilar arisida ishenchsizlikni qozghap, uning xelq'ara obrazi we amérika - xitay munasiwitige dexli yetküzüdu . Shunga xitay dunyawi mesililerge ré'alistik mu'amile qilishi kérek" dep tekitligen.

Toluq bet