Үрүмчидә 'деңиз сүйини ғәрбкә башлаш қурулуши' һәққидә муһакимә йиғини чақирилған

"Бохәй деңизиниң сүйини шинҗаңға йөткәш қурулуши"ниң әмәлгә ешиш мумкинчилики иқтисадий, екологийилик, бихәтәрлик вә башқа җәһәтләрдики амиллар сәвәбидин бәзи хитай мутәхәссислириниң гуманини қозғиған. Улар бу һәқтә һөкүмәтни агаһландурған.
Мухбиримиз әркин
2010-11-11
Елхәт
Пикир
Share
Принт

Йеқинда хитайниң һәр қайси җайлиридин кәлгән 120 дәк мутәхәссис үрүмчидә йиғин ечип, бохәй деңизиниң сүйини уйғур елиға йөткәш қурулуши һәққидә муһакимә елип барған иди.

Йәрлик даириләр мәзкур қурулуш пиланини қоллиған болсиму, лекин бу пилан бәзи мутәхәссисләрниң вә муһитни қоғдиғучи актипларниң тәнқидигә учриған.

"Уйғур биз" тор бекитиниң хәвиридин мәлум болушичә, 5‏ - ноябир күни үрүмчидә чақирилған йиғинда хитай мутәхәссислиридин профессор ху югуаң бу қурулушниң қийинлиқ дәриҗиси вә қурулушқа кетидиған чиқим төвән мөлчәрлинип, йөткәшкә болидиған су миқдари вә иқтисади - иҗтимаий үнүми көптүрүветилгәнликини илгири сүргән.

Профессор ху югуаңниң әскәртишичә, шәрқниң сүйини ғәрбкә йөткәш қурулушиниң узун муддәтлик нишани шинҗаңда 10 миң квадрат келометир келидиған бир көлни бәрпа қилиш болуп, бу бохәй деңизиниң бир йерим һәссисигә тәң дегәнликтур. Буниң үчүн бохәй деңизидин 3 тирлион 700 милярд тонна су йөткәшкә тоғра келидикән.

Профессор ху югуаң йәнә, бу пиланда суниң парға айлиниш миқдари һесабқа елинмиғанлиқини әскәртип, бир тонна суни деңиз йүзидин 1280 метир егизликкә елип чиқиш үчүн 4.6 Киловат ток сәрп қилишқа тоғра келидиғанлиқини, 3 тирлион 700 милярд тонна суни уйғур елиға апириш үчүн 30 тирлион йүән сәрп қилинидиғанлиқини билдүргән. Ху югуаң, бу чиқимниң һесабқа елинған - елинмиғанлиқи мәлум әмәсликини тәкитлигән.
 
Лекин, америка вал стрет журнал гезитиниң хәвәр қилишичә, уйғур аптоном районлуқ тәрәққият тәтқиқат мәркизи иқтисади бөлүминиң мәсули ли шин бу қурулушни қоллап, буниң уйғур елидики су кәмчиллик мәсилисини һәл қилидиғанлиқини илгири сүргән.

Уйғур аптоном райони даирилири 2006‏ - йили хитай дөләт кабинтиға бу һәқтә доклат йоллиған иди. Мәлум болушичә, вен җябав доклатни көрүп чиқип, техиму тәпсилирәк тәтқиқат елип беришни тәләп қилған.


 
Пикирләр (0)
Share
Толуқ бәт