Ürümchide 'déngiz süyini gherbke bashlash qurulushi' heqqide muhakime yighini chaqirilghan

"Boxey déngizining süyini shinjanggha yötkesh qurulushi"ning emelge éshish mumkinchiliki iqtisadiy, ékologiyilik, bixeterlik we bashqa jehetlerdiki amillar sewebidin bezi xitay mutexessislirining gumanini qozghighan. Ular bu heqte hökümetni agahlandurghan.
Muxbirimiz erkin
2010-11-11
Élxet
Pikir
Share
Print

Yéqinda xitayning her qaysi jayliridin kelgen 120 dek mutexessis ürümchide yighin échip, boxey déngizining süyini Uyghur éligha yötkesh qurulushi heqqide muhakime élip barghan idi.

Yerlik da'iriler mezkur qurulush pilanini qollighan bolsimu, lékin bu pilan bezi mutexessislerning we muhitni qoghdighuchi aktiplarning tenqidige uchrighan.

"Uyghur biz" tor békitining xewiridin melum bolushiche, 5‏ - noyabir küni ürümchide chaqirilghan yighinda xitay mutexessisliridin proféssor xu yugu'ang bu qurulushning qiyinliq derijisi we qurulushqa kétidighan chiqim töwen mölcherlinip, yötkeshke bolidighan su miqdari we iqtisadi - ijtima'iy ünümi köptürüwétilgenlikini ilgiri sürgen.

Proféssor xu yugu'angning eskertishiche, sherqning süyini gherbke yötkesh qurulushining uzun muddetlik nishani shinjangda 10 ming kwadrat kélométir kélidighan bir kölni berpa qilish bolup, bu boxey déngizining bir yérim hessisige teng dégenliktur. Buning üchün boxey déngizidin 3 tirli'on 700 milyard tonna su yötkeshke toghra kélidiken.

Proféssor xu yugu'ang yene, bu pilanda suning pargha aylinish miqdari hésabqa élinmighanliqini eskertip, bir tonna suni déngiz yüzidin 1280 métir égizlikke élip chiqish üchün 4.6 Kilowat tok serp qilishqa toghra kélidighanliqini, 3 tirli'on 700 milyard tonna suni Uyghur éligha apirish üchün 30 tirli'on yüen serp qilinidighanliqini bildürgen. Xu yugu'ang, bu chiqimning hésabqa élin'ghan - élinmighanliqi melum emeslikini tekitligen.
 
Lékin, amérika wal strét zhurnal gézitining xewer qilishiche, Uyghur aptonom rayonluq tereqqiyat tetqiqat merkizi iqtisadi bölümining mes'uli li shin bu qurulushni qollap, buning Uyghur élidiki su kemchillik mesilisini hel qilidighanliqini ilgiri sürgen.

Uyghur aptonom rayoni da'iriliri 2006‏ - yili xitay dölet kabintigha bu heqte doklat yollighan idi. Melum bolushiche, wén jyabaw doklatni körüp chiqip, téximu tepsilirek tetqiqat élip bérishni telep qilghan.


 
Toluq bet