Явропа иттипақиниң хитайға қойған қорал- ярақ ембаргосини келәр йилниң башлири бикар қилидиғанлиқи илгири сүрүлди

Франсийә лемондие гезитиниң явропа иттипақи әмәлдарлириниң сөзини нәқил кәлтүрүп хәвәр қилишичә, явропа иттипақи хитай 1989 - йили тйәнәнмен оқуғучилар демократийә һәрикитини бастурғандин кейин, хитайға қойған қорал-ярақ ембаргосини келәр йилниң башлири бикар қилмақчи икән.
Мухбиримиз әркин
2010-12-30
Елхәт
Пикир
Share
Принт

Хәвәрдә явропа иттипақи ташқи ишлар комиссари катерин аштон ханимға йеқин мәнбәләрдин нәқил кәлтүрүп, қорал-ярақ ембаргосиниң "пат йеқинда бикар қилиниши "мумкинлики билдүрүлгән. Лемондие гезитиниң илгири сүрүшичә, берюсселдики явропа иттипақиниң бир дипломатик әмәлдари бу һәқтики хәвәрни муәййәнләштүрүшни рәт қилған болсиму, лекин аштон ханимниң бу йил 16 ‏- вә 17 ‏- декабирдики явропа иттипақи рәһбәрлириниң йиғиниға доклат сунуп, ембаргони бикар қилиш тәклипи бәргәнликини билдүргән.

Аштон ханим явропа иттипақи рәһбәрлиригә сунған доклатида ембаргониң явропа-хитай бихәтәрлик вә ташқи сиясәт җәһәттики һәмкарлиқиға " чоң тосалғу" пәйда қиливатқанлиқини илгири сүргән. Бәзи көзәткүчиләр бу мәсилиниң келәр йили 1 ‏- айниң оттурилири венгрийидә чақирилидиған явропа иттипақи ташқи ишлар министирлириниң йиғинида музакирә қилинидиғанлиқини пәрәз қилишмақта.

Хитай явропа иттипақидин қорал-ярақ ембаргосини бикар қилишни изчил тәләп қилип кәлгән иди. Йеқинда хитайниң берюсселдики баш әлчиси суң җи, явропа иттипақи ембаргони бикар қилмиса, явропа қорал-ярақ карханилириниң "пурсәтни қолдин берип қойидиғанлиқи " ни тәкитлигән. Лекин, америка дөләт мәҗлиси, тәйвән, хәлқара кишилик һоқуқ тәшкилатлири, уйғур вә тибәт паалийәтчилири явропа иттипақиниң ембаргони бикар қилишиға изчил қарши туруп кәлди.

 Уйғур паалийәтчилириниң илгири сүрүшичә, хитайға қорал-ярақ ембаргосини бикар қилиш хитайға хата сигнал берип, хитай қораллиқ күчлириниң уйғурларни бастурушиға йешил чирағ яққанлиқтур. Лекин, явропа иттипақи ембаргони бикар қилиш мәсилисидә изчил пикир бирлики һасил қилалмай кәлди. Иттипақниң бу йил 9 ‏- сентәбирдә чақирилған ташқи ишлар министирлири йиғинида бәзи дөләтләр ембаргони шәртлик бикар қилишни тәләп қилған иди.

Пикирләр (0)
Share
Толуқ бәт