Béyjingdiki eydiz bimarlirining hoquqini qoghdash jem'iyiti teqib qilishqa uchridi

"Xitaydiki eydiz bimarlirining hoquqlirini qoghdashni meqset qilghan" béyjing eyjishing tetqiqat ornining amérikida turuwatqan mes'uli wen yenxey ependi bayanat élan qilip, yéqindin buyan xitay da'irilirining eyjishing tetqiqat ornini teqib qilishni kücheytkenlikini, mezkur teqibleshlerni döletlik baj we bixeterlik organlirining sadir qiliwatqanliqini bildürdi.
Muxbirimiz ümidwar
2010-12-22
Élxet
Pikir
Share
Print

B b s agéntliqining xewer qilishiche, eyjishing tetqiqat ornining qanun meslihetchisi bu yilning béshidin tartip, mezkur orunning béyjing baj organlirining tekshürüshige uchrap, hazirghiche héchqandaq netijige érishelmigenliki, özining 18-dékabir küni döletlik amanliqni qoghdash we baj organliri teripidin özliri bilen shertsiz yosunda maslishishqa chaqirilip so'al-soraq qilin'ghanliqini eskertken.

Eyjishing tetqiqat jem'iyitining élan qilghan bayanatida 2004-, 2006, 2007-yilliri béyjing baj organlirining özlirini dawamliq tekshürüp turghanliqi körsitilip, béyjing da'irilirining her xil bahaniler bilen siyasiy jehettin bésim qiliwatqanliqi tekitlen'gen.

Béyjing eyjishing tetqiqat ornining mes'uli, eydiz bimarlirining hoquqini qoghdash pa'aliyetchisi wen yenxey ependi amérikigha kélip panahlan'ghan hemde yéqinda lyu shawboning nobél tinchliq mukapatini élish murasimigha teklip qilin'ghan idi. Wen yenxey ependi Uyghur eydiz bimarlirining hoquqlirini qoghdash üchünmu belgilik pa'aliyetler élip barghan.

Buningdin ilgiri eydiz bimarlirining hoquqini qoghdash pa'aliyetchisi xu jya béyjingda türme jazasigha höküm qilin'ghan idi. Yéqinda béyjing merkiziy millet uniwérsitétining oqutquchisi, Uyghur hoquq qoghdighuchisi ilham toxti ependi dölet amanliq saqlash xadimliri teripidin a'ilisi bilen birge bir hepte nezerbend qilin'ghan.

Toluq bet