Kanada bash ministiri xarpérning qolidiki tizimlikte nur mehemmet yasinning ismi bar

Kanada bash ministiri stéfén xarpér 12 ‏ - ayning 2 ‏ - künidin 6 ‏ - künigiche xitayni ziyaret qilidu. Uning xitay bilen sözleshkende otturigha qoyudighan, xelq'ara kechürüm teshkilati azad qilmaqchi bolghan siyasiy mehbuslar tézimlikide nur mehemmed yasinning ismimu bar.
Muxbirimiz weli
2009-11-28
Élxet
Pikir
Share
Print

Birleshme agéntliqining bayan qilishiche, kanada bash ministiri stéfén xarpér buningdin burunqi töt yil ichide, kanadaning kishilik hoquq qimmet qarishida ching turup, xitaydiki kishilik hoquq depsendichilikini qattiq eyiplep, xitaygha bésim ishlitip kéliwatqan dölet rehbiri. Uni xitayning tashqi ishlar ministirliki bayanatchisi chin'gang 'biz xalimaydighan heriket bilen shughullinidighan kishi', 'uning dalay lamani qollighini aqmaydu' dep jakarlap kelmekte.

Xelq'ara kechürüm teshkilati we kanadiki kishilik hoquq teshkilatliri, xitay türmiliridiki siyasiy jinayetchilerni azad qilish üchün bash ministiri xarpérning bu qétimqi xitay ziyaritidin ümid kütmekte. Ular xarpérgha tapshurghan 11 neper siyasiy jinayetchi tizimlikide, nur mehemmed yasinni 'yawa kepter namliq meshhur edebi eserni yazghan meshhur yazghuchisi biguna Uyghur, xitay uni bölgünchilikni terghip qildi, dep 2004 ‏ - yili 2‏ - ayda qolgha élip 10 yilliq qamaq jazasigha höküm qildi, u, 1974‏ - yili maralwéshida tughulghan, uning edebiy texellusi örkishi, u hazir ürümchi 1‏ - türmiside' dep körsetti.

Ottawa uniwérsitétini ziyaret qiliwatqan mutexessis shéngshüning bayan qilishiche, kanada bash ministiri xarpér iqtisadiy menpe'et aldida kishilik hoquqni qayrip qoyidighan erbab emes, u amérika prézidénti obamagha oxshimaydu, bash ministir xarpérning kishilik hoquq qimmet qarishi nahayiti éniq, meydani mustehkem, xitay türmiliridiki siyasiy mehbuslarni azad qilish jehette uningdin ümid kütüsh mumkin.
 
Shinxu'a agéntliqi bügünki xewiride kanada bash minstiri xarpérni, xitay bilen soda, meblegh sélish, muhit asrash we rayon xarektérliq bixeterlik meslilirini öz ichige alghan muhim mesililer üstide sözlishidu, dep bayan qildi.

 
Toluq bet