Uyghur rayonidiki herqaysi organlargha yéngi békitilgen 26 neper emeldarning aran 5 nepiri xitay emes

Yéqinda Uyghur aptonom rayonluq xelq qurultiyi da'imiy kéngishining qararigha asasen, Uyghur rayonidiki herqaysi nazir, sheher derijilik organlarning yéngi emeldarliri békitip chiqilghan. Shinxu'a toridin bérilgen xewerdin qarighanda, qarargha asasen bu organlargha 26 neper yéngi bashliq belgilen'gen bolup, bularning ichide aran 5 nepiri milliy kadir iken.
Muxbirimiz irade
2010-12-02
Élxet
Pikir
Share
Print

Yeni, bu qétim qurultayda aptonom rayonimizdiki herqaysi wilayet we sheher derijilik organlargha nazir, mu'awin nazir, sotchi, mu'awin sotchi qatarliq emeldarlarning besh nepiridin sirt, qalghanliri hemmisi xitay millitidin terkib tapqan.

Uyghur biz torining sahibi, milletler uniwérsitétining proféssori ilham toxti ependi bundin ilgiri bu heqte chet'el metbu'atlirigha bergen bayanatida, Uyghur élide hökümet orunlirida ishleydighan Uyghur qatarliq milliy kadirlarning sanining barghanséri aziyip kétiwatqanliqini, milliy kadirlarning xitay kadirlar bilen barawer mu'amile körmeydighanliqidek mesililerni otturigha qoyup, xitayning az sanliq milletler siyasitini tenqid qilghan idi.

"Uyghur biz" tori yene bu yil 4 - öktebirdiki sanida, bu yil Uyghur aptonom rayonluq partkomda ishleydighan Uyghur kadirlarning nisbiti 7%ke, aptonom rayonluq xelq hökümitide ishleydighan Uyghur kadirlarning nisbiti 9% ke chüshüp qalghanliqi heqqide xewer bergen. Emma, xewerde bu uchurni yetküzgüchi kishi öz bixeterlikidin ensirigini üchün hazirche éniq bolghan sanliq melumatlarni jem'iyetke ashkarilimighan idi.

Toluq bet