Xitayning misirdiki elchixanisi Uyghur oqughuchilarni xitayche sözlesh-yézish kursigha orunlashturdi

Keyshyen téléwiziyiside bérilgen xewerdin ashkarilinishiche, xitayning misirda turushluq bash elchixanisi misirda oquwatqan Uyghur oqughuchilarni mexsus "Xitay tilida sözlesh-yézish" boyiche terbiyilesh kursigha orunlashturghan.
Muxbirimiz irade
2012-09-20
Élxet
Pikir
Share
Print

2012-Yilliq Uyghur oqughuchilarni xitay tilda terbiyilesh kursi 9 hepte dawam qilghan bolup, 18-séntebir küni kursning ayaghlishish murasimi ötküzülgen. Murasimda kursqa toluq qatniship bergen 9 oqughuchi mukapatlan'ghan.

Murasimda yene, xitayning misirda turushluq elchixanisining ma'aripqa mes'ul diplomati xu wénjé söz qilip, misirda oquwatqan Uyghur oqughuchilargha "Xitay tilini yaxshi öginip, weten'ge qaytip xizmet qilip, döletning yaxshiliqigha jawab qayturunglar" dep chaqiriq qilghan.

Ular yene, xitaychining hazir dunyadiki muhim tillarning biri ikenlikini, xitayche öginishning oqughuchilarning riqabette üstünlükni igilishige paydiliq bolidighanliqini eskertken. Emma Uyghur közetküchiler bolsa kursning oqughuchilarning talantini östürüshtin bek, ularni kontrol qilishtek siyasiy meqsetke igilikige ishinidu.

Chünki, xitay da'iriliri 2009-yili ürümchi weqesi yüz bergendin kéyin aldi bilen misir kéyin türkiye, yaponiye qatarliq Uyghur oqughuchilar merkezlik oquwatqan ellerde birdinla "Shinjangliq wetenperwer oqughuchilar" deydighan atalghuni chiqirip, nahayiti az miqdardiki simwol xaraktérlik oqush mukapat puli tesis qilghan we elchiliklerde türlük pa'aliyetlerni uyushturush arqiliq oqughuchi balilarni elchixana bilen qoyuq alaqe ornitishqa ündigen.

Xitayning bu herikiti bolsa chet'ellerdiki Uyghur teshkilatliri we Uyghur oqughuchilarni bi'aram qiliwatqan bolup, bezi oqughuchilar, xitay da'irilirining Uyghur oqughuchilarning heriketlirini kontrol qilishqa urunuwatqanliqi we Uyghurlar arisigha bölgünchilik salmaqchi boluwatqanliqidin shikayet qilghan idi.

Toluq bet