Хитай дөләтлик баш ишчилар уюшмиси уйғур елидә ишчилар сепиниң муқимлиқиға капаләтлик қилишини тәләп қилди

26- Ноябир хитай дөләтлик баш ишчилар уюшмиси үрүмчидә " шинҗаңға ярдәм бериш хизмити йиғини" ечип, уйғур елидики һәр дәриҗилик ишчилар уюшмисиниң " шинҗаңға ярдәм бериш хизмити" гә асас селишини, һәмдә уйғур елидә ишчилар сепиниң муқимлиқиға капаләтлик қилишини тәләп қилди.
Мухбиримиз җүмә
2010-11-27
Елхәт
Пикир
Share
Принт

Мәзкур йиғинниң хитай мәркизий һөкүмити " шинҗаңға ярдәм бериш" пиланини оттуриға қоюп, уйғур елигә хитай кадирларни һәдәп йөткәватқан пәйтләрдә ечилиши көзәтчиләрниң диққитини қозғиди.

Йиғинға уйғур елигә йеңидин тәйинләнгән баш секретар җаң чүшән хитай дөләтлик баш ишчилар уюшмисиниң рәиси ваң йүпулар қатнашқан.

"Тәңритағ" ториниң хәвиригә қариғанда, ишчилар уюшмиси хитай мәркизий һөкүмитиниң "шинҗаңға ярдәм бериш хизмити" гә ихтисаслиқларни чиқирип, ярдәм беридикән.

Хәвәрдә мәзкур ихтисаслиқларни тәрбийиләш үчүн 2011- йилидин башлап хитай әмгәк институтида тәрбийиләш курси ачидиғанлиқи көрситилгән болсиму, тәрбийилинидиған хадимларниң қәйәрдин елип келидиғанлиқи тәпсилий оттуриға қоюлмиған.

Хитай мәркизий һөкүмити " шинҗаңға ярдәм бериш хизмәт йиғини" ни ачқандин кейин, хитайниң 19 өлкә- шәһәрлири уйғур елигә қаратмилиқ ярдәм беридиғанлиқини елан қилған вә уйғур елигә хадим әвәтишкә башлиған иди.

Канададики нам-шәрипини ашкарилашни халимиған бир уйғур зиялийсиниң билдүрүшичә, хитай мәркизий һөкүмити аталмиш "шинҗаңға ярдәм бериш хизмити" намида уйғур елиниң һәр қайси җайлириға тәкшүргүчи хадимларни әвәтип, уйғур елиниң нопус көчүрүшкә болидиған җайлири, уйғур елидә хитай ширкәтлиригә базар ечиш яки әрзан әмгәк күчи базиси тепиш үстидә тәтқиқат елип барған.

У мундақ деди: " ишчилар уюшмиси хитай һөкүмәт аппаратиниң бир қисми болуп, мәзкур йиғиндин уйғур елидики ишчилар уюшмисиниң техиму кеңийидиғанлиқи һәмдә уюшма вәзийитидә өзгүрүш болидиғанлиқини һес қиливалғили болиду."

Униң қаришичә, хадим йөткәш ишчилар уюшмисиниң хизмитигә биваситә тәсир көрситидикән.

Пикирләр (0)
Share
Толуқ бәт