Xitay döletlik bash ishchilar uyushmisi Uyghur élide ishchilar sépining muqimliqigha kapaletlik qilishini telep qildi

26- Noyabir xitay döletlik bash ishchilar uyushmisi ürümchide " shinjanggha yardem bérish xizmiti yighini" échip, Uyghur élidiki her derijilik ishchilar uyushmisining " shinjanggha yardem bérish xizmiti" ge asas sélishini, hemde Uyghur élide ishchilar sépining muqimliqigha kapaletlik qilishini telep qildi.
Muxbirimiz jüme
2010-11-27
Élxet
Pikir
Share
Print

Mezkur yighinning xitay merkiziy hökümiti " shinjanggha yardem bérish" pilanini otturigha qoyup, Uyghur élige xitay kadirlarni hedep yötkewatqan peytlerde échilishi közetchilerning diqqitini qozghidi.

Yighin'gha Uyghur élige yéngidin teyinlen'gen bash sékrétar jang chüshen xitay döletlik bash ishchilar uyushmisining re'isi wang yüpular qatnashqan.

"Tengritagh" torining xewirige qarighanda, ishchilar uyushmisi xitay merkiziy hökümitining "shinjanggha yardem bérish xizmiti" ge ixtisasliqlarni chiqirip, yardem béridiken.

Xewerde mezkur ixtisasliqlarni terbiyilesh üchün 2011- yilidin bashlap xitay emgek institutida terbiyilesh kursi achidighanliqi körsitilgen bolsimu, terbiyilinidighan xadimlarning qeyerdin élip kélidighanliqi tepsiliy otturigha qoyulmighan.

Xitay merkiziy hökümiti " shinjanggha yardem bérish xizmet yighini" ni achqandin kéyin, xitayning 19 ölke- sheherliri Uyghur élige qaratmiliq yardem béridighanliqini élan qilghan we Uyghur élige xadim ewetishke bashlighan idi.

Kanadadiki nam-sheripini ashkarilashni xalimighan bir Uyghur ziyaliysining bildürüshiche, xitay merkiziy hökümiti atalmish "shinjanggha yardem bérish xizmiti" namida Uyghur élining her qaysi jaylirigha tekshürgüchi xadimlarni ewetip, Uyghur élining nopus köchürüshke bolidighan jayliri, Uyghur élide xitay shirketlirige bazar échish yaki erzan emgek küchi bazisi tépish üstide tetqiqat élip barghan.

U mundaq dédi: " ishchilar uyushmisi xitay hökümet apparatining bir qismi bolup, mezkur yighindin Uyghur élidiki ishchilar uyushmisining téximu kéngiyidighanliqi hemde uyushma weziyitide özgürüsh bolidighanliqini hés qiliwalghili bolidu."

Uning qarishiche, xadim yötkesh ishchilar uyushmisining xizmitige biwasite tesir körsitidiken.

Toluq bet