Xitay Uyghur rayonidiki néfit turuba yolining bixeterlikidin qattiq endishe qilmaqta

Shinjang xewer torining bügünki bir xewiridin ashkarilinishiche, xitay da'iriliri Uyghur rayondiki néfit turuba yollirining bixeterlikidin qattiq endishe qilmaqta.
Muxbirimiz shöhret hoshur
2012-12-31
Élxet
Pikir
Share
Print

Mezkur xewerde xitayning qazaqistandin bu yil import qilghan omumi néfit miqdarining 50milyon tonnidin ashqanliqi bayan qilin'ghandin kéyin, bu néfit toshuluwatqan turuba yolining qazaqistanning natasu baziridin bashlinip Uyghur rayonining alataw chégra éghizidin ötüp maytagh néfit merkizige tutishidighanliqi we buning 1200 kilométirliq musape ikenliki eskertilgen.

Xewerde alataw éghizi tamozhnisining bixeterlik xizmiti mes'ulining sözliri neqil élinip, nöwette mezkur turuba yoli bixeterlikining qattiq tekshürülüp turuluwatqanliqi, bu jehettiki bixeterlikke qilchimu biperwaliq qilishqa bolmaydighanliqi tekitlen'gen؛ emma xewerde bu xil bixeterlik sezgürlükining qachandin bashlap we néme sewebtin kücheygenliki tilgha élinmighan.

Uyghur közetküchilerning perez qilishiche, yéqinda xotende yüz bergen ayropilan bulashqa urunush weqesi we qaghiliqta yüz bergen herbiy gazarmigha motsiklitliq hujum qilish weqesi qatarliq zor weqeler xitay da'irilirining mezkur bixeterlik sahesige qattiq diqqet qilishigha seweb bolghan bolushi mumkin.

Buningdin birqanche yil ilgiri, amérikidiki gherb, sherq tetqiqat ornining bir mutexessisi, eger xitay Uyghur rayondiki milliy ziddiyetlerni waqtida toghra hel qilmisa, ottura asiyadin bashlan'ghan néfit turuba yollirining hujumgha uchrash éhtimalliqini otturigha qoyghan؛ u yene bunchilik uzun musapidiki turuba yolini bixeterlik tedbirini herqanche küchlendürüp qoghdap bolghili bolmaydighanliqini eskertken.

Toluq bet