Хитайниң сабиқ норвегийә баш министириға виза бәрмәслики норвегийини һәйран қалдурди

Хитайдики бир дини ишлар йиғиниға қатнишиш үчүн визиға илтимас қилған сабиқ норвегийә баш министири кеҗәл бондовеккә хитай даирилири виза беришни рәт қилди.
Мухбиримиз ирадә
2012-06-12
Елхәт
Пикир
Share
Принт

Бирләшмә агентлиқиниң хәвәр қилишичә, хитайниң бу һәрикити униң норвегийигә 2010-йилидики нобел мукапатидин қәпқалған «қорсақ көпүки» билән мунасивәтлик икән. Шу йили норвегийидики нобел мукапати комитети хитайниң күчлүк қаршилиқ билдүрүшигә қаримай, хитай түрмисидә «дөләтни парчилашқа урунди» дегән җинайәт билән җаза муддити өтәватқан өктичи язғучи лю шавбони нобел тинчлиқ мукапатиға лайиқ көргән иди.

Әйни чағда икки дөләт арисида дипломатик кризисқа сәвәб болған бу мәсилиниң һала бүгүнки күнгә қәдәр давамлишиши, йәнә келип 2005-йили баш министирлиқ вәзиписини тамамлап болған бир сабиқ башлиқниң хитай визиси елишиниң рәт қилиниши норвегийә даирилирини қаттиқ әпсусландурған. Улар «бу қарар бизни һәм қаттиқ һәйран қалдурди һәм қаттиқ әпсусландурди» дегән.

Франсийә агентлиқиниң хәвәр қилишичә, бу хәвәр норвегийә мәтбуатлирида кәң инкас қозғиған. Сабиқ баш министир бу һәқтики баянатида «мәнчә бу тәсири яхши болмиған бир иш. Бу пәқәт хитайниң икки йил аввалқи ишқа нисбәтән һазирғичә өз мәйданини көрсәтмәкчи болуватқанлиқини испатлап бериду, халас» дегән.

Хитайниң ослодики әлчиханиси мухбирларниң бу һәқтики соаллирини җавабсиз қалдурған.

Пикирләр (0)
Share
Толуқ бәт