Франк волф: ' обама һөкүмити вәдисидә турмиди'

Америка дөләт мәҗлиси әзаси франк волф (Frank Wolf) йеқинда, обама һөкүмитиниң бу нөвәтлик бирләшкән дөләтләр тәшкилати кишилик һоқоқ кеңишиниң хитай қатарлиқ дөләтләрниң кишилик һоқоқ хатирисини тәкшүрүш йиғиниға қатнашмиғанлиқини қаттиқ әйиблиди.
Мухбиримиз гүлчеһрә
2009-02-17
Елхәт
Пикир
Share
Принт

9 ‏ - Феврал күни франк волф кеңәш палатасида сөзлигән сөзидә, хитай, куба, сәуди вә русийә қатарлиқ дөләтләрни дунядики инсан һәқлирини әң еғир дәпсәндә қиливатқан дөләтләр дәп атиған вә америкиниң бирләшкән дөләтләр тәшкилатиниң мәзкур дөләтләрниң кишилик һоқуқ хатирисини қәрәллик тәкшүрүшидә сүкүттә турғанлиқидин интайин үмидсизләнгәнликини ипадилигән.

У, "обама һөкүмити кишилик һоқоқ мәсилисини дөләт сияситиниң әң алдиға қойидиғанлиқини билдүргән иди, әпсус бирләшкән дөләтләр тәшкилати йиғинида сүкүттә туруши обама һөкүмитиниң өз вәдисигә мухалип " дегән.
 
Дөләт мәҗлис әзаси франк волф йәнә, обама һөкүмитиниң бу пассип һәрикитидин қаттиқ үмидсизләнгәнликини ипадиләп, америка ташқи ишлар министири һелларий келинтонғиму мәктүп йоллиған вә мәктүбида, америка хитайни 1999 - йилидин буян кишилик һоқоқ җәһәттә алаһидә көзитилидиған дөләтләр қатариға киргүзгән болсиму, әмма америкиниң бу нөвәт сүкүттә турғанлиқидин әпсусланғанлиқини оттуриға қойған.

Франк волф, кишилик һоқуқ мәсилиси җәһәттә хитайни әң қаттиқ әйибләп келиватқан шундақла уйғурлар мәсилисигә йеқиндин көңүл бөлүп келиватқан америка дөләт мәҗлиси әзалириниң бири.

Асия дөләтлиригә қарита зияритини башлиған килнтон ханим, алдинқи күнидә бу қетим хитай зияритидә кишилик һоқуқ җәһәттә хитайға йәнила бесим ишлитидиғанлиқини тәкитлигән иди.


Пикирләр (0)
Share
Толуқ бәт