Özbékistan xitaygha tebi'iy gaz yetküzüshke bashlidi

Özbékistan döletlik xewer agéntliqi "Uza" charshenbe künidiki xewiride özbékistanning xitaygha tebi'iy gaz yetküzüshke bashlighanliqini élan qildi.
Muxbirimiz irade
2012-09-13
Élxet
Pikir
Share
Print

Bu tebi'iy gaz toshush 8-ayda bashlinip bolghan bolsimu, emma özbék da'iriliri charshenbe küni özbékistan prézidénti islam kérimof bilen xitay mu'awin bash ministiri xuy lyangyü arisida élip bérilghan resmiy uchrishishni xewer qilghanda mezkur mesilini tilgha alghan.

Birleshme agéntliqi bu heqtiki xewiride, özbék tebi'iy gaz tijaritini bügünki künlerge qeder rusiyining gazprom shirkiti kontrol qilip kéliwatqanliqini eskertip, buning rusiye üchün anche yaxshi xewer emeslikini bildürgen.

Énérgiyige bolghan éhtiyaji künsayin éship bériwatqan xitay hazir mol énérgiye zapisigha ige ottura asiya elliridin néfit we tebi'iy gaz yötkesh qedimini tézlitish üchün turuba yolliri qurulushini kéngeytmekte.

Gherbning gazini sherqqe yetküzüsh qurulush pilani boyiche hazirghiche 2 liniye ishqa kirishtürülüp boldi. Türkmenistandin bashlinip, Uyghur éli arqiliq fujyen ölkisige tutushidighan 3-liniye qurulushi 2 yil ichide püttürülmekchi.

Özbék xewer agéntliqi öz xewiride, 3-liniye pütüp ishqa kirishken teqdirde, özbékistan we xitaydin ibaret ikki dölet arisidiki néfit we tebi'iy gaz tijaritining közge körünerlik derijide ashidighanliqini bildürgen.

Toluq bet