Хитай соти икки нәпәр тибәтликни «башқиларни өзини көйдүрүшкә күшкүртүш» билән җазалиди

Хитай сот даирилири пәйшәнбә күни икки нәпәр тибәтликкә «башқиларни өзини көйдүрүшкә күшкүртүш» дегән җинайәтни артип, еғир җазаларға һөкүм қилди.
Мухбиримиз ирадә
2013-01-31
Елхәт
Пикир
Share
Принт

Сичүәнниң аба районлуқ сот мәһкимиси пәйшәнбә күнидики сот нәтиҗисидә, 40 яшлиқ лораң конкокни икки йил кечиктүрүп иҗра қилинидиған өлүм җазасиға, 31 яшлиқ лораң сериңни 10 йиллиқ қамақ җазасиға һөкүм қилди.

Бирләшмә агентлиқиниң билдүрүшичә, хитай һөкүмити вәқәгә қаттиқ инкас қайтуруш арқилиқ бундақ һәрикәтниң техиму көп йүз беришиниң алдини алмақчи болған. Чүнки даириләр районда қаттиқ тәдбирләрни елишиға қаримай, тибәтликләрниң өзини көйдүрүш арқилиқ һөкүмәткә наразилиқ билдүрүшини тосуп қалалмиған иди.

Бүгүн хитай ташқи ишлар баянчиси хуң лей вәқә һәққидики баянатида икки нәпәр тибәтликниң гунаһсиз кишиләрни өзини көйдүрүшкә мәҗбурлиғанлиқини илгири сүрүп «биз бу сот нәтиҗиси арқилиқ хәлқара җамаәтниң далай лама гуруһидикиләрниң җинайәтлирини очуқ көрүвелишини үмид қилимиз» дегән.

Хитай даирилири бу һәрикәтни далай гуруһидикиләрниң күшкүртүватқанлиқини илгири сүрүп мәсулийәттин өзини қачуруп кәлди. Әмма тибәтләр вәқәгә хитай һөкүмитиниң тибәтләр үстидин йүргүзүватқан сияситиниң сәвәб болуватқанлиқини билдүрмәктә.

Пикирләр (0)
Share
Толуқ бәт