Хитай, дөләт вә ширкәтләрниң пулини елип қачқан 580 җинайәт гумандариниң чәтәлләрдә панаһлиниватқанлиқини билдүрди

Хитай җ х министирлиқи иқтисадий җинайәтләр бөлүминиң мәсули миң чиңфең, түнүгүн хитай күндилик гезити мухбириға қилған сөзидә, хитайдин дөләт вә ширкәтләрниң пулини елип қачқан иқтисадий җинайәт гумандарлиридин аз дегәндә 580 кишиниң нөвәттә чәтәлләрдә панаһлиниватқанлиқини билдүрди.
Мухбиримиз шөһрәт һошур
2010-12-29
Елхәт
Пикир
Share
Принт

Униң билдүрүшичә, бу җинайәт гумандарлири қанунсиз ианә топлаш, банкиларни алдап қәрз елиш вә тиҗарәттә сахта тохтам түзүш қатарлиқ һәр хил йоллар билән дөләт вә ширкәтләрниң зор миқдардики пулини қолға чүшүрүп чәтәлләргә елип кәткән.

Мәлум болушичә, хитайниң нөвәттә 37 дөләт билән җинайәт гумандарлирини қайтуруп бериш һәққидә түзгән келишими мәвҗут. Миң чиңфеңниң билдүрүшичә, мана бу келишимгә асасән, хитай 2006‏-йилдин буян, 20 дөләттин пәқәт 250 җинайәт гумандарини қайтуруп әкитәлигән. Әмма, көпинчә дөләтләрниң қанун системисидики пәрқләр сәвәбидин, хитай өзиниң тәләп қилған кишилирини қайтуруп әкитәлмигән. Бу хил мисаллардин бири 10 нәччә йилдин буян канадада панаһлиниватқан, хитай һөкүмити тәрипидин чоң типтики иқтисадий җинайәт гумандари дәп қаралған ләй чаңшиң дегән кишидур. Канада сот мәһкимиси, хитайда өлүм җазаси йолға қоюлуватқан вә сорақ җәрянида қийин-қистақ йүргүзүлүватқан болғачқа, ләй чаңшиңни хитайға қайтуруп беришни рәт қилған.

Пикирләр (0)
Share
Толуқ бәт