Qaramayda yüz bergen ot kétish weqesi filim qilip ishlendi

Xongkongdiki xelq'ara filim féstiwaligha 1994 - yili qaramayda yüz bergen ot apiti heqqide ishlen'gen bir höjjetlik filim qatnashturuldi. Mezkur weqe 1994 - yili 12 - ayning 8 - küni qaramaydiki bir tiyatirxanida yüz bérip, köpinchisi Uyghur bolghan 300 din artuq ösmür oqughuchi paji'elik halda hayatidin ayrilghan idi.
Muxbirimiz irade
2010-04-01
Élxet
Pikir
Share
Print

Birleshme agéntliqi bu heqte bergen xewiride mundaq dep bayan qilidu: weqe bolup aridin 16 yil ötken bolsimu, bu qétimliq ot apitige da'ir gumanlar we so'allar téxi yéshilmidi. Néme üchün ot tiyatirxana chiraqliri arqiliq  perdilerge tutushup ot köyüshke bashlighanda oqughuchi balilar "rehberler aldi bilen jénini ep qachsun" dep toxtitip qoyuldi? némishqa chiqish éghizlirining köpinchisi taqaq idi? ulargha qachan ölüm ispati bérilidu?

Musteqil filim ishligüchi shü shin qaramaydiki ot apiti toghriliq ishligen höjjetlik filimide mana bu mesililerni ipade qilghan. Birleshme agéntliqining bayan qilishiche, 6 sa'et dawam qilidighan bu filimde héchqandaq muzika we yan bayan ishlitilmigen bolup, shu waqittiki matériyallar, ölgüchilerning ata -aniliri we ot apitidin qutulup qalghan oqughuchi balilarning sözlirige eynen yer bérilgen. Filimde kishige eng tesir qilidighini, filimde ot apitidin qutulup qalghan bir qizning awazi qarangghu ékranda bérilgendin kéyin axirida uning otta köyüp tonughusiz bopketken yüzi körsitilgen.

Melum bolushiche, filimde yene apet bolghan neq meydan we doxturxanigha ep kélin'gen jesetlerning körünüshlirimu qoyulghan bolup, buni ölgüchilerning ata - aniliri teminligen iken. Filim ishligüchi shü shin sözide, özining bu filimni ishlesh jeryanida bextke yarisha pash bop qalmay, saq - salamet filimni chégridin ep chiqiwalghanliqini, emma filimning xitayda körsitilishidin ümid yoqluqini ipade qilghan.

Toluq bet