Yéngi yil harpisida Uyghur rayonida qattiq zerbe bérish bashlandi

Dunya Uyghur qurultiyining bayanatchisi dilshat rishitning radi'omizgha xewer qilishiche, Uyghur rayonida yéngi yil aldida jem'iyet amanliqini tüzesh bahanisi bilen Uyghurlargha qarita yene bir qétimliq qattiq zerbe bérish herikiti bashlan'ghan.
Muxbirimiz irade
2010-12-23
Élxet
Pikir
Share
Print

Igilinishiche, hazir Uyghur rayonning jenub we shimalidin ürümchige kélidighan herqaysi yoluchi béketlirini saqchilar qattiq tekshürüwatqan bolup, ular héchqandaq qanuniy resmiyiti bolmighan asasta kishilerni, bolupmu Uyghurlarni qattiq teqib astigha élip, ularning üsti - béshini xalighanche tekshürüp, xalighanche qolgha almaqta iken.

Dilshat rishitning éytishiche, charshenbe küni chüshtin kéyin ürümchi jenubi wogzalida 6 neper Uyghur, saqchilarning axturushigha uchrighan we kéyin qolgha élinip ketken bolup, ularning köpinchisi ayal kishiler iken.

Istansimiz xitayche bölümining muxbiri weqeni éniqlash üchün jenubiy wogzal saqchixanisigha téléfon qilghinida, saqchi weqening rastliqini delilligen we 6 neper kishining yénida kimliki bolmighanliqtin qolgha élin'ghanliqini, tekshürülüp bolghandin kéyin qoyuwétilgenlikini éytqan. U yene hazir ürümchide her qaysi béketlerde bixeterlik tekshürüsh, charlash xizmetlirining qattiq élip bériliwatqanliqini éytqan.

Dunya Uyghur qurultiyining bayanatchisi dilshat rishit ependi bolsa, xitay da'irilirining bu xil qattiq zerbe bérish we charlash heriketlirining peqetla Uyghurlarnila nishan qilghanliqini, eksiche xitaydin kéliwatqan minglighan xitay köchmenlirining bundaq mu'amilige uchrimaydighanliqini bildürüp, bu xil heriketlerning ikki millet arisidiki milliy ziddiyetni téximu ötkürleshtürüwétidighanliqini éytti.

Toluq bet