Қирғизистанда йеңи асасий қанунни қобул қилиш бойичә аммиви беләт ташлаш өткүзүлди

27 - Июн күни қирғизистанда йеңи асасий қанунни һимайә қилиш бойичә аммиви беләт ташлаш елип берилди. Мәзкур референдомниң асасий мәзмуни йеңи асасий қанунни қобул қилиш яки қилмаслиқ, роза отунбайеваниң өткүнчи дәврдики президентлиқ салаһийитини етирап қилиш яки қилмаслиқ қатарлиқ мәзмунларни өз ичигә алидикән.
Мухбиримиз үмидвар
2010-06-27
Елхәт
Пикир
Share
Принт

Беләт ташлаш пүтүн мәмликәт бойичә өткүзүлгән болуп, өзбекләр билән қирғизлар арисида қанлиқ тоқунуш болған ош шәһиридики беләт ташлашқа роза отунбайева өзи биваситә рәһбәрлик қилған.

Қирғизистанниң 24.Кг учур ториниң хәвәр қилишичә, йәкшәнбә күни кәчкичә беләт ташлиғанларниң нисбити 62 % кә йәткән болуп, москва вә башқа шәһәрләрдики қирғизистанлиқларму беләт ташлиған. Қирғизистан вақитлиқ һөкүмити референдомниң мувәппәқийәтлик болғанлиқи, йеңи асасий қанунниң күчкә игә болуп, қирғизистанда парламентлиқ дөләт түзүминиң әмәлгә ашидиғанлиқини илгири сүргән.

27 - Июндики референдомдин илгири бишкәк, ош вә башқа җайларда җиддий кәйпият давамлашқан болуп, кишиләр бу күнидә сабиқ президент бақийеф тәрәпдарлириниң йәнә мәсилә пәйда қилишидин әнсиригән иди.

Қирғизистан бихәтәрлик қисимлири беләт ташлаш понкитлириниң тәртипи вә бихәтәрликини қоғдиғанлиқи мәлум. Бирақ, һазирқи вақитлиқ һөкүмәткә өктичилик қиливатқан гуруппилар "ошта қанлиқ тоқунуш келип чиққан вақитта аммиви беләт ташлаш елип бериш тоғра әмәс", дәп қарши чиққан.

Толуқ бәт