Русийә билән һиндистан һәрбий һәмкарлиқини техиму күчәйтишни қарар қилди

Русийә президенти дмитрий медведев 21-, 22-декабир күнлири һиндистанда қизғин кәйпиятта күтивелишға еришти.
Мухбиримиз үмидвар
2010-12-22
Елхәт
Пикир
Share
Принт

Ройтерсниң хәвәр қилишичә, медведевниң икки күнлүк зиярити җәрянида русийә билән һиндистан атом енергийиси, илғар күрәшчи айропилан техникиси вә содиси һәм башқа саһәләргә аит 30 келишим имзалиған болуп, һиндистан мәзкур техникилар үчүн йигирмә йилға йеқин вақит ичидә 35 милярд доллар сәрп қилишқа рази болған.

Русийә мәтбуатлири дмитрий медведевниң бу қетимқи һиндистан зияритигә юқири баһа бәрмәктә һәмдә икки дөләт һәрбий мунасивәтлириниң техиму қоюқлишиватқанлиқини көрсәтмәктә.

Русийә учурлиридин мәлум болушичә, медведев йеңи деһлида һиндистан баш министири манмухан сиңк билән болған сөһбәтләрдә русийиниң һиндистанниң шаңхәй һәмкарлиқ тәшкилатиға рәсмий әза болушини қоллайдиғанлиқи вә буниңға ярдәм беридиғанлиқини билдүргән. У йәнә бирләшкән дөләтләр тәшкилати ислаһат қилинса, һиндистанниң б д т бихәтәрлик кеңишиниң даимлиқ әзаси болушини қоллайдиғанлиқини тәкитлигән.

Русийә мутәхәссислири русийиниң һиндистанниң шаңхәй гуруһидики әзалиқини қоллишиниң хитайниң қарши елишиға еришәлмәйдиғанлиқи, нөвәттә, шаңхәй тәшкилатиға йеңи әза қобул қилишта хитай билән русийиниң пикир ихтилапи барлиқи, мумкин қәдәр икки тәрәпниң өзлиригә йеқин дөләтни әзалиққа тәшәббус қилидиғанлиқини билдүрүшмәктә.

Русийә президентиниң һиндистан сәпиридин бир һәптә илгири хитай баш министири вен җябав һиндистанни зиярәт қилип, һиндистан билән сода -иқтисадий һәмкарлиқ келишимлири түзгән иди. Әмма, һиндистан сабиқ совет иттипақи дәвридин тартипла изчил түрдә русийиниң йеқин шерики болуп кәлмәктә, әмма, у 1962-йили хитай билән бир қетим чегра уруши елип барған иди.

Толуқ бәт