Rusiye bilen hindistan herbiy hemkarliqini téximu kücheytishni qarar qildi

Rusiye prézidénti dmitriy médwédéw 21-, 22-dékabir künliri hindistanda qizghin keypiyatta kütiwélishgha érishti.
Muxbirimiz ümidwar
2010-12-22
Élxet
Pikir
Share
Print

Roytérsning xewer qilishiche, médwédéwning ikki künlük ziyariti jeryanida rusiye bilen hindistan atom énérgiyisi, ilghar küreshchi ayropilan téxnikisi we sodisi hem bashqa sahelerge a'it 30 kélishim imzalighan bolup, hindistan mezkur téxnikilar üchün yigirme yilgha yéqin waqit ichide 35 milyard dollar serp qilishqa razi bolghan.

Rusiye metbu'atliri dmitriy médwédéwning bu qétimqi hindistan ziyaritige yuqiri baha bermekte hemde ikki dölet herbiy munasiwetlirining téximu qoyuqlishiwatqanliqini körsetmekte.

Rusiye uchurliridin melum bolushiche, médwédéw yéngi déhlida hindistan bash ministiri manmuxan singk bilen bolghan söhbetlerde rusiyining hindistanning shangxey hemkarliq teshkilatigha resmiy eza bolushini qollaydighanliqi we buninggha yardem béridighanliqini bildürgen. U yene birleshken döletler teshkilati islahat qilinsa, hindistanning b d t bixeterlik kéngishining da'imliq ezasi bolushini qollaydighanliqini tekitligen.

Rusiye mutexessisliri rusiyining hindistanning shangxey guruhidiki ezaliqini qollishining xitayning qarshi élishigha érishelmeydighanliqi, nöwette, shangxey teshkilatigha yéngi eza qobul qilishta xitay bilen rusiyining pikir ixtilapi barliqi, mumkin qeder ikki terepning özlirige yéqin döletni ezaliqqa teshebbus qilidighanliqini bildürüshmekte.

Rusiye prézidéntining hindistan sepiridin bir hepte ilgiri xitay bash ministiri wén jyabaw hindistanni ziyaret qilip, hindistan bilen soda -iqtisadiy hemkarliq kélishimliri tüzgen idi. Emma, hindistan sabiq sowét ittipaqi dewridin tartipla izchil türde rusiyining yéqin shériki bolup kelmekte, emma, u 1962-yili xitay bilen bir qétim chégra urushi élip barghan idi.

Toluq bet