Хитай сериқ деңизда һәрбий маневер өткүзүшкә қарши икәнликини билдүрүп, америка билән җәнубий корийини агаһландурди

Шималий корийиниң өткән шәнбә күни җәнубий корийини топқа тутуш вәқәсидә тәрәпләрни өзини тутувелишқа чақирип, пйоңяңни ашкара тәнқид қилиштин өзини қачурған хитай һөкүмити, җүмә күни сериқ деңизда һәрбий маневир елип беришқа қарши икәнликини әскәртип, америка билән җәнубий корийини агаһландурди.
Муһбиримиз әркин
2010-11-26
Елхәт
Пикир
Share
Принт

Хитай ташқи ишлар министирлиқи баянатчиси лей хоң җүмә күни баянат елан қилип, "биз бу мәсилидә изчил вә ениқ мәйданда туримиз. Биз һәр қандақ тәрәпниң бизниң иқтисади районимизда биздин рухсәтсиз һәр қандақ һәрбий маневир елип беришқа қарши туримиз"дегән. Буниңдин бурун хитай һөкүмити америка вә җәнубий корийиниң сериқ деңизда һәрбий маневир өткүзүшигә қарши туридиғанлиқини әскәрткән. Һәтта, хитай баш министири вен җябав " иғвагәрчилик характерлик һәр қандақ һәрбий маневирға қарши туридиғанлиқи " ни билдүргән иди.

Өткән сәйшәнбә күни шималий корийиниң җәнубни топқа тутуш вәқәси йүз бәргәндин кейин, америка, японийә вә җәнубий корийә қатарлиқ дөләтләр хитайдин дәрһал өз мәйданини ипадиләп, шималий корийини тәнқид қилишни, өз тәсир күчидин пайдилинип, шималий корийиниң иғвагәрчилик һәрикитини тосашни тәләп қилған. Лекин хитай тәрәп тосушни рәт қилип, тоқунушуватқан тәрәпләрни өзини тутувелишқа чақирған иди. Хәвәрләрдин мәлум болушичә, нөвәттә корийә йерим арилиниң вәзийити давамлиқ кәскинләшкән. Җәнубий корийә президенти пәйшәнбә күни юнюң вә униң әтрапидики бир қанчә аралға җәнубий корийә деңиз армийисиниң қуруқлуқта уруш қилиш қисимлиридин 4 миң кишилик әскәр йөткигән вә шундақла дөләт мудапиә министири ким теюңниң истипасини қобул қилип, униң орниға җәнубий корийә армийисиниң пинсийигә чиққан сабиқ штап башлиқи ким вәнҗинни тәйинлигән.

Толуқ бәт